Një aksident tragjik ka ndodhur në Itali duke i marrë jetën 16-vjeçarit shqiptar Gabriel Alibeaj i cili kishte dalë më shokët mbrëmjen e së martës, më 6 shtator por nuk mundi të kthehej më kurrë në shtëpi. Ai ishte bashkë më dy shokë në Villafranca di Verona dhe tragjedia ndodhi momentin kur ata po ktheheshin në shtëpi. Teksa po ktheheshin me një triçikël, Gabrieli dhe shoku i tij ranë nga mjeti dhe i riu shqiptar përplasi fortë kokën në tokë. Ata u dërguan menjëherë në spital me helikopter ku u shtruan në gjendje të rëndë. Gabrieli ishte një djalë që ëndërronte të bëhej futbollist dhe këtë sport ai e praktikonte që në fëmijëri. Kohën e lirë e ndante gjithmonë mes stërvitjeve dhe ndeshjeve me miqtë. Gabrielin do ta priste një ardhme e ndritur dhe ishte klubi Lunigiana Pontremolese 1919 që shkroi fjalë entuziaste për të ardhmen e sportistit, duke e konsideruar “ndër protagonistët absolutë të sezonit që sapo ka përfunduar”. Njoftimin për ndarjen nga jeta e bëri i ati i Gabrielit, ku falenderon të gjithë ata që u lutën për të.
“Ju falenderoj të gjithëve për lutjet tuaja, tani lutemi për shpirtin e tij. Gabriel nuk ia doli. Luftoi si luan, i mbështetur nga familja dhe lutjet e miqve, por nuk u zgjua. Në dhimbjen më të thellë la të atin, Altinin, nënën Imeldën dhe motrën e vogël Chiara, të cilat e donin shumë”.
