TIRANË– “BMW-ja”, e cila u përfshi në aksidentin e rëndë të një dite më parë tek diga e Liqenit Artificial nuk drejtohej nga Eldi Alushi por nga Emiliano Nina, ky i fundit kushëri i të shumëkërkuarit të drejtësisë Ervis Martinajt dhe një emër i njohur për Policinë e Shtetit. Sipas Policisë, e cila ka dalë me një njoftim zyrtar në lidhje me ngjarjen mjeti drejtohej nga Nina, tashmë i shpallur në kërkim për veprët penale: “Shkelja e rregullave të qarkullimit rrugor”, “Drejtimi i automjetit në mënyrë të parregullt”, “Largimi nga vendi i aksidentit”, “Shkatërrimi i pronës”, “Moskallëzimi i krimit”, “Veprime që pengojnë zbulimin e së vërtetës” dhe “Prodhimi, mbajtja, blerja apo shitja pa leje e armëve të ftohta”.
Ndërsa Eldi Alushi, i cili gjatë ditës së djeshme u tha se ishte shoferi i “çmendur” ka qenë pasagjer dhe do të përballet me drejtësinë për akuzat e: “Moskallëzim i krimit”, “Veprime që pengojnë zbulimin e së vërtetës” dhe “Përkrahja e autorit të krimit”; Vijon puna për kapjen e Emiliano Ninës. Policia ka kryer kontroll në banesën e tij por s’e ka gjetur aty.
Kush është Emiliano Nina?
Emiliana Nina është kushëri i të shumëkërkuarit të drejtësisë Ervis Martinaj. Nina rezulton të jetë një person me precdentë të theksuar kriminal dhe i ndaluar dhe herë të tjera nga Policia. Nina njihet dhe me emrin Emiljano Tasho. Në vitin 2015, ai u shpall në kërkim nga Policia për vrasjen e 30 vjeçarit Enton Nikaj. Ngjarje e ndodhur në nëntor në parkingun e një restoranti në Linzë, ku mbeti i plagosur edhe pronari i biznesit.
NJOFTIMI I POLICISË:
Specialistët e Qarkullimit Rrugor, në vijim të veprimeve procedurale për aksidentin e ndodhur rreth orës 05:15, të datës 22.08.2023, në Rrugën e Kosovarëve, kanë arrestuar shtetasin: -Eldi Allushi, 26 vjeç, banues në Durrës, për veprat penale “Moskallëzim i krimit”, “Veprime që pengojnë zbulimin e së vërtetës” dhe “Përkrahja e autorit të krimit”; -kanë referuar materialet në Prokurori ku ka nisur procedimi në gjendje të të lirë për shtetasin Jurgen Allushi, 25 vjeç, për veprën penale “Moskallëzimi i krimit”; – kanë shpallur në kërkim shtetasin Emiljano Nina, 28 vjeç, banues në Tiranë, për veprat penale “Shkelja e rregullave të qarkullimit rrugor”, “Drejtimi i automjetit në mënyrë të parregullt”, “Largimi nga vendi i aksidentit”, “Shkatërrimi i pronës”, “Moskallëzimi i krimit”, “Veprime që pengojnë zbulimin e së vërtetës” dhe “Prodhimi, mbajtja, blerja apo shitja pa leje e armëve të ftohta”. Nga veprimet hetimore dyshohet se shtetasi Emiljano Nina, duke drejtuar automjetin “BMW”, në pronësi të shtetasi Eldi Allushi, për shkak të shpejtësisë shumë të lartë, ka humbur kontrollin, për pasojë automjeti ka dalë nga rruga dhe është përplasur me bordurën anësore, te Liqeni Artificial. Pasagjer në këtë automjet ka qenë shtetasi Jurgen Allushi, i cili pas aksidentit, është larguar bashkë me drejtuesin e automjetit. Shtetasi Eldi Allushi ka përkrahur drejtuesin e automjetit dhe ka penguar në zbardhjen e rrethanave të ngjarjes, duke dhënë dëshmi të rreme në lidhje me rrethanat e aksidentit. Në cilësinë e provës materiale është sekuestruar një shkop bejsbolli që është gjetur në banesën e shtetasit Emiljano Nina. Policia vijon kontrollet për kapjen dhe arrestimin e këtij shtetasi.
