Ministrja e Arsimit dhe Sportit, Ogerta Manastirliu, Ministri për Evropën dhe Punët e Jashtme, Igli Hasani, së bashku me mbi 100 studentë dhe pedagogë nga universitetet shqiptare, morën pjesë në Audiencën e Përgjithshme të Atit të Shenjtë Papa Françesku, e mbajtur në Aula Paolo VI në Vatikan. Në këtë takim domethënës, në kuadër të Vitit Jubilar, u përcollën mesazhet e vlerave universale të paqes, harmonisë, solidaritetit dhe humanizmit.
Pas audiencës, Ministrja Manastirliu, së bashku me delegacionin shqiptar, pati mundësinë të takonte Atin e Shenjtë, Papa Françeskun.
Në këtë udhëtim simbolik e kulturor, studentët shqiptarë nga Universiteti i Tiranës, Universiteti “Zoja e Këshillit të Mirë”, Universiteti i Mjekësisë, Universiteti “Mesdhetar” i Tiranës, Universiteti “Roma TRE”, Universiteti “La Sapienza” dhe Universiteti i Studimeve të Perugias patën mundësinë të shkëmbejnë eksperienca dhe të reflektojnë mbi rëndësinë e arsimit dhe edukimit si ura lidhëse mes popujve.
Në vazhdim të vizitës në Romë, delegacioni shqiptar, drejtuar nga Ministri Hasani dhe Ministrja Manastirliu, zhvilluan një takim me Shkëlqesinë e Tij, Imzot Paul Richard Gallagher, Sekretar për Marrëdhëniet me Shtetet dhe Organizatat Ndërkombëtare. Përgjatë këtij takimi, vlerësuam marrëdhëniet e shkëlqyera që ekzistojnë mes Shqipërisë dhe Selisë së Shenjtë, si dhe dakorduam të çojmë më lart progresin e këtyre marrëdhënieve.
