Manastirliu inkurajon të rinjtë nga Kamza: Zgjidhni zanatin, për sukses të garantuar

Fushata e Ministrisë së Arsimit dhe Sportit, “Zgjidh Zanatin”, ka vijuar me nxënës, prindër dhe mësues në Kamëz. Ministrja e Arsimit dhe Sportit Ogerta Manastirliu, bashkë me kryetaren e Kuvendit Lindita Nikolla dhe kryetarin e Bashkisë Kamëz Rakip Suli, kanë marrë pjesë në aktivitetin e organizuar në shkollën 9-vjeçare të rindërtuar, “Lidhja e Prizrenit” në Kamëz, për promovimin e arsimit profesional, me nxënës, prindër, mësues, përfaqësues të biznesit, etj. Ministrja Manastirliu, u ka bërë thirrje të gjithë nxënësve dhe prindërve të ndërgjegjësohen për orientimin drejt arsimit profesional, për një të ardhme të sigurt për të rinjtë, për t’u integruar në tregun e punës. “Unë dua të inkuraroj të rinjtë e kësaj shkolle, ashtu sikurse dua të inkurajoj të rinjtë dhe prindërit e Kamzës, mësuesit gjithashtu, që t’i përdorin këto instrumenta që kemi për të gjurmuar talentet dhe prirjet e nxënësve dhe për t’i orientuar ata drejt arsimit profesional. Të mirat e arsimit profesional janë jo vetëm të prekshme, por sot po bëhet dhe një nevojë e madhe kombëtare. Për t’ju përgjigjur zhvillimit ekonomik dhe social të vendit, për t’ju përgjigjur nevojave të tregut të punës, ne duhet të jemi të fokusuar tek ndërgjegjësimi i çdo të riu për rëndësinë që ka të paturit e një zanati”,- tha Ministrja Manastirliu. Duke folur për transferimet nga gjimnazet në shkollat profesionale Ministrja Manastirliu, bëri me dije se falë mekanizmave të krijuar dhe fushatës intesive të komunikimit me nxënësit në këto dy muaj, janë transferuar drejt arsimit profesional edhe nxënës me rezultate të larta. “Në 2 muaj janë transferuar rreth 200 nxënës të shkollave të ndryshme të vendit, të klasave të 10-ta, drejt arsimit profesional. Nuk janë vetëm ata me arritje dhe rezultate modeste, por edhe ata që kanë rezultate të larta, të cilët po vijojnë arsimin profesional, me dëshirën për të thelluar studimet e tyre drejt arsimit të lartë, por edhe me dëshirën për të patur një profesion që në një moshë të re”,- tha Ministrja Manastirliu.
Kryetarja e Kuvendit Lindita Nikolla ka vlerësuar fushatën “Zgjidh Zanatin”, si një iniciativë që ju garanton të rinjve një të ardhme më të mirë. “Unë besoj që nga 200 nxënës, do të bëhen 400, e shumë e më shumë, jo thjesht dhe vetëm se kjo është një fushatë për të patur sa më shumë numra në arsimin profesional, por se kjo është një fushatë që orienton më së miri fëmijët tanë, që orienton më së miri suksesin e tyre nesër në tregun e punës”,- theksoi Kryetarja e Kuvendit Lindita Nikolla. Duke theksuar rëndësi e orientimit drejt profesionit, Kryetari i Bashkisë Kamëz, Rakip Suli ka bërë me dije investimin madhor që ka nisur në shkollën profesionale Kamëz. “Sot tek shkolla profesionale ka filluar edhe një investim rreth 4.5 milion euro, ku do jenë të gjitha standartet, sepse në shkolla profesionale, në pjesën më të madhe duhet pjesa e praktikës, është shumë e rëndësishme, që ai djalë ose ajo vajzë kur të dalë nesër në jetën e përditshme të punës, të dalë me të vërtetë një nxënës që për atë që është arsimuar, të njohë edhe pjesën e punës”,- tha kryetari i Bashkisë Rakip Suli. Deri në fund të muajit dhjetor, nxënësit e klasave të 10-ta, që duan të zgjedhin një zanat, mund të transferohen pa burokraci nepërmjet e-Albania nga gjimnazi, në shkollat profesionale. Në shkollën “Lidhja e Prizrenit” në Kamëz, është mirëpritur fushata “Zgjidh Zanatin” nga mësuesit, nxënësit dhe prindërit, për orientimin drejt arsimit profesional, fushatë e MAS, e cila do të vijojë në të gjithë vendin.