Manastirliu: Më shumë investime për kërkimin shkencor në universitete
Ministria e Arsimit dhe Sportit ka zgjeruar investimet për zhvillimin e kërkimit shkencor në institucionet e arsimit të lartë, duke synuar të rrisë cilësinë e arsimit dhe zhvillimit teknologjik.
Ministrja Ogerta Manastirliu theksoi rëndësinë e përmirësimit të infrastrukturës kërkimore, gjatë vizitës në Universitetin Politeknik të Tiranës, në dy laboratorët e rinj, Laboratorin e Makinave Elektrike në Fakultetin e Inxhinierisë Elektrike dhe Laboratorin e Provave në Vibrime në Fakultetin e Inxhinierisë Mekanike.
“Universiteti Politeknik i Tiranës, si investimet në infrastrukturë edhe në projektet e kërkim zhvillimi, ka pasur 10 projekte të financuara, ndërkohë që në të gjithë universitetet, si dhe në akademi dhe biznes janë mbi 130 projekte të kërkimit të financuara.”, tha Ministrja e Arsimit dhe Sportit, Ogerta Manastirliu.
Dy laboratorë e rinj janë të financuar nga Agjencia Kombëtare e Kërkimit Shkencor, Teknologjisë dhe Inovacionit (AKKSHI).
Laboratori i Makinave Elektrike në Fakultetin e Inxhinierisë Elektrike është i pajisur me teknologjinë më të fundit dhe synon të përmirësojë përgatitjen praktike të studentëve, por nga ana tjetër do të shërbejnë dhe për nxitjen dhe zhvillimin e kërkimit shkencor në fushën e makinave elektrike.
Po ashtu Laboratori i Provave në Vibrime në Fakultetin e Inxhinierisë Mekanike u krijua për të avancuar kërkimin në mekanikën e vibrimeve dhe do tu shërbejë studentëve për studime të avancuara në programet master dhe doktoratë.
Ministrja Manastirliu tha se investimet do të vijojnë me mbështetjen e projekteve të kërkim zhvillimit shkencor.
“Me miratimin e buxhetit të ri, do të hapim më shpejt thirrjen për projekte kërkimore dhe investime në fushën e shkencës dhe teknologjisë, duke përforcuar rolin e universiteteve tona si qendra të zhvillimit dhe inovacionit,” theksoi Manastirliu.
Këto investime janë një hap i rëndësishëm për të nxitur dhe forcuar kërkimin shkencor duke krijuar mundësi më të mira për studentët dhe stafin akademik në universitete tona.
