Ministrja e Arsimit dhe Sportit, Ogerta Manastirliu, duket se ka kërkesa të veçanta për komoditetin personal, edhe pas një fushate të ngarkuar elektorale. Një tender i hapur së fundmi nga institucioni që ajo drejton, parashikon një shërbim larje të përditshëm për automjetin zyrtar me të cilin ajo lëviz – një Audi A8.
Sipas dokumenteve të tenderit, kjo makinë duhet të lahet 30 herë në muaj, duke përfshirë edhe ditët e pushimit, të shtunat dhe të dielat. E njëjta kërkesë vlen edhe për disa automjete të tjera të përdorura nga zëvendësministrat dhe drejtues të tjerë, si Toyota RAV4 dhe Volvo XC60.
Ndërkohë, mjete të tjera më të vogla si Hyundai Getz, Toyota Prius dhe Hyundai Santa Fe, do të lahen një herë në javë. Po ashtu, është parashikuar që tapiceria e brendshme e makinave të lahet 7 herë në vit.
Vlera totale e parashikuar për këtë tender arrin në rreth 10 mijë euro, ndërsa një nga kushtet është që lavazhi të ndodhet jo më larg se 2.5 km nga selia e ministrisë, duke e bërë të qartë se shërbimi kërkohet të jetë sa më i afërt dhe i shpejtë.
Frekuenca e larjes, sidomos për makinën e ministres, ngre dyshime për përdorim të automjetit edhe jashtë orarit zyrtar, dhe shton kritikat mbi përdorimin e fondeve publike për qëllime personale.
