TIRANË– Përfaqësuesi ligjor i Partisë Demokratike Marash Logu ka kërkuar nga Gjykata Kushtetuese të detyrojë Kuvendin të çojë në gjyq çështjen e mandatit të deputetes Olta Xhaçka. Sipas tij Kushtetuesja e thotë fjalën e fundit për këtë çështje.
Marash Logu: Kuvendi rrëzoi kërkesën e deputetëve. Kuvendi nuk ka përgjegjësi ligjore të bëjë interpretime, të hyjë në meritat e çështjes. Nuk kërkojmë që Gjykata të shprehet sot për mandatin e deputetes Olta Xhaçka. Kërkojmë që Gjykata Kushtetuese të detyrojë Kuvendin të sjellë çështjen në Gjykatë dhe të jetë Gjykata Kushtetuese të thotë fjalën e fundit mbi këtë çështje.
Sipas opozitës ministrja është në konfikt interesi pasi bashkëshorti i saj është shpallur investitor strategjik nga qeveria dhe ka përfituar tokë shtet në Dhërmi për ndërtimim e një resorti. Sipas avokatit të Xhaçkës, Genci Çifligu, shqyrtimi i papajtueshmërisë së mandatit në Gjykatën Kushtetuese është në tejkalim të afateve kohore të parashikuara në ligj dhe kësisoj “nuk përbën subjekt kushtetues”.
