Maqedonia e Veriut, një vend me një histori të pasur kulturore dhe identitet të larmishëm, do të jetë për herë të parë pjesë e Javëve Kulturore Ndërkombëtare, me një program gjithëpërfshirës që do të zhvillohet nga data 23 deri më 30 prill, në Tiranë.
Java Kulturore e Maqedonisë së Veriut sjell një mozaik ngjarjesh që pasqyrojnë shpirtin artistik dhe trashëgiminë e thellë kulturore të këtij vendi ballkanik. Nëpërmjet muzikës, traditave popullore, verës dhe teatrit bashkëkohor, publiku shqiptar do të ketë mundësinë të përjetojë thellësisht kulturën e shtetit fqinj në të gjitha dimensionet e saj.
Programi do të hapet më 23 prill, ora 20:00, në Katedralen Ortodokse në Tiranë, me koncertin novator “Eyes to the Future”, një bashkëpunim i veçantë mes pianistes së njohur maqedonase Ema Popivoda dhe DJ-së shqiptare me famë ndërkombëtare Rea Lemnusha. Ky projekt muzikor përfaqëson bashkimin mes traditës klasike dhe rrymave moderne elektronike, duke simbolizuar vizionin dhe shpresën për një të ardhme kulturore europiane.
Nga data 25 deri më 30 prill, në Qendrën e Informacionit Kulturor të Maqedonisë së Veriut në Tiranë, do të qëndrojë e hapur Ekspozita e pikturave të Kostumeve Tradicionale të Maqedonisë së Veriut. Pjesë e këtij aktiviteti do të jetë edhe promovimi i librit “Monografia e Kostumeve Popullore të Maqedonisë së Veriut” i profesor Vladimir Janevski. Ky aktivitet vjen si një homazh për trashëgiminë e pasur veshjeve popullore nga të gjitha rajonet e Maqedonisë.
Më 26 prill, ora 16:00–18:30, te Hyrja e Piramidës, do të mbahet eventi “Promovimi i Verës së Maqedonisë së Veriut dhe Turizmit të Verës”, ku 12 kantina të njohura maqedonase do të prezantojnë verëra autentike të tyre. Ky aktivitet synon të përçojë aromën dhe shijen unike të verës maqedonase, si dhe potencialin e madh të vendit për zhvillimin e turizmit të verës.
Java do të mbyllet më 30 prill, ora 19:00, në ArTurbina, me shfaqjen teatrale “8%?” nga Teatri i Artit Bashkëkohor në Bitola, me regji të Jovan Ristovski. E bazuar në histori të vërteta të diskriminimit në Ballkan, kjo shfaqje sjell një reflektim të thellë mbi bashkëjetesën, identitetin dhe të drejtat e njeriut, dhe do të prezantohet me titra në shqip për publikun vendas.
