TIRANË– Kompozitori Mario Deda i ftuar në emisionin “Stay Tuned” me moderatoren Valbona Mhilli në MCN TV ka treguar disa nga angazhimet e tij me të cilat po merret gjatë kësaj periudhe kur shprehet se përditshmëria e punës së tij mbetet muzika. Ai është ndalur paksa dhe te marrëdhënia me vëllain e tij Julin për të cilin tha se e ka pasur gjithmonë një repitacion të fortë mbi, ndërsa ka treguar dhe seriozitetin e babait të tij Zefit si baba që sipas Marios i ka kryer shumë mirë detyrat e tij kundrejt tyre.
“Në 30 vitet e fundit po merrem me muzikë, me ulje-ngritje, por kjo është puna ime e përditshme. Nuk jam nga ata që kërkoj shumë prej kësaj jete, përpiqem shumë, por se vrasë mendjen në mënyrë kapitale për të arritur. Nuk është se ndjehem shumë special si profesionist muzikor”.
Në vijim ai shprehet se në familjen Deda ka qenë gjithmonë i vogli i shtëpisë, por jo i ledhatuari pasi i tillë ishte Juli, fëmija i parë.
“Me Julin kam një diferencë 5 vjet dhe kjo diferencë na ka bërë ti kemi shumë të qarta këto hierarkitë tona. Unë e kam respektuar gjithmonë Julin për shkak të diferencës së moshës, ka pasur një reputacion mbi mua shumë të fortë qoftë dhe në këshillime. Përpiqesha ta ndiqja nga pas Julin, por nuk më ka lënë shumë shteg. Kur thoshte diçka me rreptësi asaj i qëndronte. Shoku më i mirë është Juli i cili ka qenë 5 vjet hapa para meje dhe e kam pas gjithmonë model”.
I pyetur se si ka qenë Zef Deda si baba, Mario me nota humori përgjigjet se nuk njeh variant tjetër babai përveç Zefit.
“Ai ka gjithmonë serioz, në kuptimin jo i rreptë, por seriozisht i ka kryer detyrat e tij dhe na ka ndenjur mbi kokë sepse unë me Julin kemi pasur fusha të ndryshme dhe karaktere të ndryshme si tipa. Sigurisht që na ka lënë dhe lirinë me zgjedh duke u shkëputur nga streha familjare natyrisht. Zefi besoj se është treguar serioz në sjellje dhe edukimin me ne”.
