FIER-Masakra e ndodhur ditën e djeshme në Tiranë ka prekur dhe revoltuar mbarë opinion publik por ama këtë të enjte ka qenë vetëm një person që ka protestuar për këtë çështje. Edmond Hoxha, 46 vjeç me një pankartë në duar ishte i vetmi që ishte duke protestuar në Fier për vrasjen e tre grave dhe plagosjen e tre të tjerave nga “serial-killeri” Dan Hutra.
“Ku është burrëria kur ti vret një vajze, motër, nënë”– shkruhet ne pankartë.
Sipas Hoxhës me vrasjet e ndodhura ditën e djeshme nuk ka dështuar vetëm shoqëria por dhe gjithë mekanizmat e shtetit.
Dan Hutra vrau me armë zjarri shtetaset, Mevlute Hysa 30 vjeçe, motra e ish-bashkëjetueses së tij dhe Hasime Dafku 30 vjeçe, e fejuara e vëllait të ish-bashkëjetueses. Gjithashtu, plagosi ish-bashkëjetuesen e tij Elena Hysa, 35 vjeçe, dhe nënën e saj Kujtime Hysa, 60-vjeçe. Ai është edhe autori dhe i vrasjes së Etleva Kurtit po ditën e djeshme në Kamzë. 31-vjeçarja Etleva Kurti është motra e Vladimir Kurtit, i dënuar me burgim të përjetshëm për vrasjen e Agim Bucit, në vitin 2018
