TIRANË– Velipoja do të tronditej e 27 qershorit të vitit 2021 nga të shtënat me armë zjarri që i morën jetën dy vëllezërve Edmond dhe Xhovani Gocaj si dhe kamarierit të hotelit Myzeim Zeneli. Ngjarja do të quhej “Masakra e Velipojës” për shkak të gjithë asaj që ndodhi në pak momente pas një zënke për vendopsjen e shezlongëve. Ka qenë nëna e dy vëllezërve Gocaj, Angjelina Gocaj, e cila në një rrëfim për emisionin “Uniko” ka rrëfyer momente nga ngjarja e tmerrshme. Ajo shprehet se në momentin që ka shkuar në vendin e ngjarjes i ka gjetur të dy djmetë e saj të shtrirë përtokë të mbuluar nga gjaku. Sipas saj djali i vogël, Xhovani ishte ende gjallë kur ajo ka shkuar ndërsa Edmondi ishte i rrethuar nga pellgu i gjakut.
Pjesë nga biseda në emision:
Angjelina Gocaj: Unë punoj në kuzhinë, edhe djali i madh edhe djali i vogël. Kemi punuar si familje.
Spartak Koka: Atë natën e 26 Qershorit ju kishit mbaruar punën?
Angjelina Gocaj: Po, qëndruam me djemtë te shkallët jashtë edhe asnjë gjë nuk më shprehën. Pastaj jam ulur për të pushuar te dhoma. Pastaj kam dëgjuar krismat. Kam dalë te dera, kam dalë vrap, kam gjetur Xhovanin shtrirë. Kam dalë me vrap duke bërtitur, kam gjetur Xhovanin shtrirë gjallë. E kam gjetur poshtë shkallëve. E kam prekur me dorë, më ka shtrënguar dorën. Ishte gjallë, jepte shenja jete. Kam shkuar aty te ajo pema kam gjetur Kujtimin Verracaku. Kam gjetur infermieren edhe të shoqen duke i dhënë ndihmën e shpejtë, se di ishte gjallë apo jo, vetëm i thoshte të lutem ma shpëto burrin. Xhovani ka qenë gjallë aty dhe i shtrirë. Dhe Hasanin (Verracakun) e kam gjetur këtu te Xhovani.
Spartak Koka: Po djalin tjetër ku e kishe?
Angjelina Gocaj: Këtu kam gjetur Edmondin të shtrirë, i larë në gjak. Kam rënë pa ndjenja s’kam ditur gjë.
