TIRANË– Axel Hoxhaj, autori i vrasjes së Stivens Toshkesit dy ditë më pare në Tiranë është vetëdorëzuar pasditën e kësaj të enjteje në policinë e Tiranës. Sipas policisë dorëzimi i tij ka ardhur pas negociatave të vazhdueshme që policia ka pasur me familjarët e 18-vjeçarit. Stivens Toshkesi u vra me thikë dy ditë më parë pak pas mesnatës pranë shtëpisë.
Shkak për sherrin dyshohet të jetë bërë një vajzë pasi Toshkesi pretendonte se Hoxhaj i kishte ngacmuar të dashurën. Dy javë më parë ata ishin takuar në “Rrugën e Elbasanit” ku Toshkesi e ka rrahur. Dy javë më vonë Axel Hoxhaj së bashku me shokun e tij Ensi Mzenm i zunë pritë 21-vjeçarin ku Hoxhaj e masakroi me thikë duke e lënë të vdekur. Pas ngjarjes ai u largua menjëherë nga vendi i ngjarjes dhe prej dy ditësh ka qëndruar i fshehur.
NJOFTIMI I POLICISË:
Tiranë. Vetëdorëzohet autori i dyshuar i ngjarjes së ndodhur me datë 18.04.2023, ku humbi jetën shtetasi S. T. Si rezultat i presionit të kontrolleve të pandërprera nga shërbimet e Policisë dhe falë negociatave të vazhdueshme me familjarët, ditën e sotme, në DVP Tiranë, është vetëdorëzuar shtetasi A. H., 18 vjeç, banues në Tiranë. Ky shtetas, më datë 18.04.2023, rreth orës 00:15, në rrugën “Skënder Sallaku”, në bashkëpunim me shtetasin E. M., 18 vjeç, (arrestuar disa orë pas ngjarjes), kanë goditur me mjet prerës shtetasin S. T., 20 vjeç, i cili si pasojë ka ndërruar jetë. Materialet i kaluan Prokurorisë së Rrethit Gjyqësor Tiranë, për veprime të mëtejshme procedurale.
