TIRANË: Për 4 ose 5 muaj do të bëhet e mundur zëvendësimi i 105 prokurorëve të cilët deri më tani mungojnë për shkak të procesit të Vettingut, vetëlargimeve si dhe daljes në pension. Në fjalën e tij para deputetëve të Komisionit të Ligjeve Kryetari i Këshillit të Lartë të Prokurorisë, Alfred Balla ka thënë se 70 prokurorë nuk kanë kaluar ende vetingun e ndërsa asnjëherë nuk është arritur shifra e plotë sipas struktures sa i takon prokurorëve.
“Për këtë vit që kërkuam 40 kandidatë nga magjistratura, na kanë kaluar 26. Kalueshmëria në procesin e Vettingut për prokurorët ka nivelin 54%, ndërsa mbeten dhe 70 prokurorë ende në proces. Në vitin 2022, nga Vettingu në total janë konfirmuar 91 prokurorë, u shkarkuan 50. Që prej nisjes së Vettingut u dorëhoqën 21 prokurorë, 11 kanë dalë në pension”,-tha Balla.
Sakaq, gjatë mbledhjes foli edhe kreu i Inspektoratit të Lartë të Drejtësisë Artur Metani. Ai tha se deri në fund të vitit, do të hiqen ankesat e vitit 2020-2021.
‘Gjatë vitit 2022 u trajtuan 1 715 ankesa, ndërsa evidentoi si problematikë mungesën drastike të inspektorëve. Sot nga të prapambeturat; rastet janë 345 ankesa, dhe ne me ritmin që po ecim mendojmë që deri në fund të 6-mujorit ne heqim dhe çështjen e ankesave të prapambetura’-përfundoi ai.
