TIRANË– Skandali i arrestimit të ish-agjentit të FBI-së Charles McGonigal dhe lidhjet e dyshuara mes tij dhe kryeministrit Edi Rama, i cili përmendet disa herë në dosjet e drejtësisë amerikane për takimet e zhvilluara mes tyre ka përballur sot “kokë më kokë” këtë të fundit me kryetarin e Partisë Demokratike. Në të njëjtën kohë duke folur për të njëjtën çështje por me qëndrime të ndryshme Edi Rama dhe Sali Berisha “sfiduan” njëri-tjetrin. Kreu i qeverisë gjatë një interviste në “Top Story” u shpreh se nuk ka shkuar të përballet me opozitën në parlament që kërkuan interpelenca me të në lidhje me arrestimin e McGonigal pasi opozita nuk e meritonte përgjigjen e tij pasi niveli i diskutimit që ofron “pakica” siç i quan ai është shumë i ulët.
Edi Rama: Unë nuk kam heshtur. Kam thënë atë që mund të them unë në kushtet kur nuk ka asgjë që lidhet drejtpërdrejtë me mua, qeverinë apo këdo qoftë tjetër zyrtar shqiptar. Çështja ka marrë shumë bujë por jo për aspekt të hetimit që lidhet me Shqipërinë por për shkak të hetimit që lidhet me një implikim sipas akuzës për ish zyrtarin e lartë të FBI me një oligark rus shumë të njohur, Deripaska. Unë dua të përsëris sepse nuk kam shumë çfarë të them mbi këtë bisedë. Por duke qenë se sot refuzova të jem dhe do vazhdoj të jem në një sallë të kuvendit dhe të përfshihem në debat me një opozitë e cila është në një nivel etik të frikshëm dhe më ka tërhequr dhe mua në atë nivel ndonjëherë. Nga ana tjetër ia vlen që në qetësi, të shpjegohen ato gjëra që mund të shpjegohem.
Përgjigjen e mori “flakë për flakë” nga Sali Berisha, i cili i ftruar në “Opinion” e sfidoi kryeministrin që të dalë përballëtij në një debat televiziv.
Sali Berisha: Bëhu burrë dhe hajde 5 minuta këtu të shohim sa të vlen lëkura. Ose të bëhet burrë e të përballet me Luçiano Boçin në studio. Deripaska ka marrë tendera në rrugë, nga ujësjellësa. Ajo që ka ndodhur, se Deripaska i sanksionuar nga SHBA në vitin 2018, ka vazhduar i qetë deri në vitin 2022. A e ka takuar Ramën? nuk e them. A i ka paguar Deripaskën.
