SHKODËR– Është zbardhur dëshmia e dhënë në polici nga gruaja në banesën e së cilës u fut Lekë Vuksani pas vrasjes së Petrit Vuksanit në Shkodër. Para hetuesve ajo ka rrëfyer momentin e frikshëm kur autori i vrasjes ka trokitur në derën e saj dhe me armë në dorë i është futur në banesë. Ajo ka treguar se Leka i ka thënë që të mos ketë frikë pasi nuk do i bënte gjë dhe se kishte shkuar vetëm për të qëndruar. Ajo tha se është ndjerë e tmerruar deri në momenin që ka shkuar policia dhe e ka prangosur.
Dëshmia: Leka erdhi në banesën time dhe u fut brenda pasi më kërkoi t’i hapja derën. Kur u fut shoh që kishte armën në dorë dhe nuk dija si të veproja. Leka më tha se nuk do të bëj asgjë ndaj mos u tremb, kam ardhur vetëm për të qëndruar këtu. Nuk e dija se çfarë të bëja sepse ishte errësirë. Më tha që të mos tregoj se ndodhej aty deri sa erdhi policia dhe e arrestoi. Pavarësisht se më tha që të mos kem frikë, isha e frikësuar edhe pse gjatë kohës që qëndroi bëri një sjellje normale.
Lekë Vuksani ekzekutoi në banesën e tij Petrit Vuksanin, të zotin e shtëpisë ku qëndronte me qira në largjen “Tom Kola” në Shkodër. Në dëshminë e dhënë ai ka treguar se muajt e fundit ka pasur debate të vazhdueshme me Petrit Vuksanin sa i përket pagesës së qirasë si dhe dritave dhe ujit. Sa i përket armës së krimit ai ka deklaruar se e ka gjetur në shtëpinë e viktimës, pas debatit me të e ka marrë dhe e ka qëlluar për vdekje.
