Charles McGonigal, ish-agjenti i spiunazhit të FBI-së, paditë e të cilit tronditën komunitetin e inteligjencës, është deklaruar sërish fajtor – këtë herë për fshehjen e pagesave sekrete nga një njeri me lidhje me inteligjencën shqiptare. McGonigal dyshohet se ka lobuar në SHBA kundër Partisë Demokratike dhe kryetarit të saj, Lulzim Basha.
Njeriu që ka kontaktuar McGonigal është identifikuar si Personi A në dosje, ose me emër si Agron Neza. Në seancën gjyqësore, sipas mediave të huaja, McGonigal pranoi falsifikimin e të dhënave dhe dhënien e deklaratave të rreme në lidhje me 225,000 dollarët që mori gjatë punës së rasteve të ndjeshme për FBI-në. Vendimi final ndaj tij është caktuar të jepet më 16 shkurt 2024.
Në gjykatë, McGonigal tha se 225,000 dollarë i ishin dhënë atij hua nga një “mik dhe partner i mundshëm biznesi” dhe se paratë kishin për qëllim të ndihmonin në krijimin e një biznesi që ai po krijonte pa dijeninë e FBI-së ndërkohë që punonte ende për Byronë. Kredia, e dhënë me tre pagesa në para, nuk kishte kushte të shkruara dhe nuk u kthye kurrë.
“Sipas fjalëve të gjyqtares Colleen Kollar-Kotelly, marrëveshja nuk kishte “asnjë kusht”. Sipas një deklarate të veprës penale, paratë lidheshin me një rrjet marrëdhëniesh që ai zhvilloi me zyrtarët shqiptarë, përfshirë kryeministrin Edi Rama. McGonigal ra dakord se ai e kishte këshilluar Ramën që të shmangte dhënien e kontratave shtetërore të energjisë për kompanitë ruse. Këshilla këto që i përfitoi një zyrtar tjetër shqiptar, i cili punonte për Ramën si këshilltar informal, edhe pse konsultohej për një kompani kineze të energjisë.”
Në gjykatë, McGonigal e përshkroi këtë përzierje konfliktuale interesi si “përpjekjet e tij për zhvillimin e biznesit personal”.
Seth DuCharme, një nga avokatët e McGonigal, u tha gazetarëve jashtë gjykatës se klienti i tij donte niste menjëherë përpjekjet e tij të biznesit pasi u tërhoq nga zyra në shtator 2018. Aktakuza pretendon se McGonigal ka vepruar për interesat e personit A (Agron Neza) që të paktën nga gushti 2017 dhe ka vazhduar pas daljes në pension të tij nga FBI, ndërkohë që nuk ka zbuluar marrëdhënien që ka pasur me kryeministrin e Shqipërisë, Edi Rama.
“Sipas aktakuzës, McGonigal mori 225,000 dollarë në para nga personi A në fund të vitit 2017. Muaj më vonë, FBI me nxitjen e McGonigal hapi një hetim për partinë kryesore politike opozitare të Ramës në Shqipëri, një hetim që përdorte personin A si burim informacioni,”- pretenduan prokurorët.
Në një udhëtim të veçantë në Austri në vitin 2017, McGonigal dhe një prokuror i Departamentit të Drejtësisë intervistuan një politikan shqiptar, të cilit McGonigal i ishte prezantuar nga Personi A, i cili kërkonte që dikush të hetonte një kërcënim me vdekje, të akuzuar në aktakuzë.
Më vonë u pretendua se politikani në fjalë ishte Tom Doshi, por ende nuk ka asnjë konfirmim zyrtar nga McGonigal.
Në publikimin e dosjes së plotë dhe aktakuzës me 9 pika që FBI ka kopsitur për ish-agjentin dhe shefin e kundërzbulimit të FBI, Charles McGonigal, protagonist është kryeministri Edi Rama dhe lufta e tij kundër opozitës. McGonigal ka zhvilluar takime të njëpasnjëshme me kryeministrin Edi Rama dhe dy persona që në dosje emërtohen si ‘Personi A’ dhe ‘Personi B’, që janë përkatësisht Agron Nezaj e Dorian Duçka, të dy të lidhur me qeverinë shqiptare.
Nezaj del në dosje si njeriu që i jep 225 mijë dollarë McGonigal në mënyrë që të ndërhyjë në FBI që të nisë hetimin për personin që po lobonte në SHBA për PD-në, në vitin 2017 kur drejtohej nga Lulzim Basha. Supozohet që bëhet fjalë për Nicolas (Nick) Muzin.
Ndërsa Duçka del si njeriu që e shoqëron kudo ish-agjentin, paguan fluturimet e akomodimet e tij, si dhe i përcjell informacionet e nevojshme që do t’i shërbenin në nisjen e hetimit nga FBI.
/ Newszone
