Saimir Zefi, shqiptari i dhunuar nga policia greke ka dhënë dëshminë e tij lidhur me ngjarjen, në një deklaratë për Fax News. Tre oficerë policie dhe shefi i tyre u dërguan në prokurorinë publike të akuzuar për torturë dhe fyerje të dinjitetit njerëzor pas ankesës së Saimir Zefi nga Puka, shqiptarit të dhunuar.
Zefi, i cili vuan dënimin me burg për drogë dhe grabitje, është ankuar në polici se teksa ndodhej në kafazin e transfertave nga Selaniku në Korydallos, e kanë goditur në kokë, ndërsa ai i ka kërkuar ujë gjatë rrugës dhe nuk ia dhanë. Të burgosurit e tjerë pohojnë dhunën e ushtruar ndaj Saimir Zefit.
Saimir Zefi: Përshëndetje, jam Saimir Zefi. Kishim një çështje para disa ditësh në Korydallos, më çuan në datën 1 atje. Nuk shkova në gjykatë se nuk më çoi policia, u dënova në mungesën time, kërkova të drejtat e mia dhe prej kësaj më kanë sakatuar. Me zor lëviz, nuk kërkoj asgjë përveç të drejtave të mia. Prangat më kanë hyrë në mish, aq shumë m’i kanë shtrënguar.
I kërkoj shtetit shqiptar, të dalë e drejta, pasi nuk kisha bërë asgjë. Burgjet e Greqisë i dënojnë shqiptarët në bazë të rracizimit, pa kujdesin që meritojmë. Ishin dhe prindërit e mi prezent, kanë video si prova, ata mund të flasin për mua kur të duhet. Jam i pafajshëm, më kanë lënë sakat. Unë jam i martuar dhe kam dy fëmijë, nuk mund të flas me ta në këtë gjendje.
Nikolla: Unë jam nga Fieri, Nikolla quhem, çfarë ka kaluar ky djali i kam kaluar dhe unë. Punoj si kuzhinier për 20 vite. Më kanë futur në një grup për vjedhje, kur unë s’kam bërë asgjë. Më kanë dhunuar që të pranoj këtë akuzë. Ata nuk kanë asnjë lloj dokumenti për ta provuar këtë. Jam duke u përpjekur ta çoj çështjen në Gjykata më të larta. Dënohemi vetëm nga emri, se jemi shqiptar. 60% e të burgosurve shqiptar në Greqi janë të pafajshëm./Fax News
