TIRANË– Prokuroria e Tiranës ka nisur hetimet për Gert Shehun, 31-vjeçarin i cili goditi me grusht kryedemokratin Sali Berishën. Mësohet se është dhënë urdhër që të sekuestrohen pamjet filmike të tre ditëve të fundit në vendet ku ka qëndruar Gert Shehu dhe për të parë se më kë është takuar. Personi i cili po e shoqëronte 31-vjeçarin pak para se të godiste me grusht Sali Berishën, ende nuk është identifikuar.
Gerti Shehu goditi me grusht kreun e Partisë Demokratike Sali Berisha ditën e djeshme. Ai u fut mes turmës dhe në një moment u afrua me shpejtësi dhe godtit Berishën. Si pasojë e sulmit kryedemokrati ra përtokë dhe u ngrit i gjakosur në fytyrë dhe me sy të nxirë. Shehu u neutralizua nga truprojat dhe protestuesit në shesh. Më pas ai u arrestua nga Policia. Sipas Policisë ai është person me skedë të pasur kriminale pasi është akuzuar më parë për plagosje, prishje të qetësisë publike dhe trafikim të lëndëve narkotike. Atij iu komunikua masa e arrestit me burg ditën e sotme në Spitalin e Traumës ku ndodhet për të marrë mjekim pasi pas incidentit u dhunua nga protestuesit.
