GREQI– Pak ditë më parë Visar Dakrama alias Julian Kosova u ekzekutua me plumb në kokë në ishullin grek të Mykonos-it pas një sherri që pati me një grek, debat që solli dhe vdekjen e tij. Këtë të mërkurë e dashura e tij është rrëfyer mes lotësh ku ka treguar momentet e kaluara me të dhe planet për të ardhmen që do të ndërtonin të dy bashkë. Në gjendje të rënduar psikologjike, ajo është shprehur se Jani, (siç njihej në Greqi), kishte planifikuar që të largohej nga ishulli dhe të zhvendosej në Selanik, por planet iu ndërprenë në mes.
Dëshmia: Ai kishte zemër si një bebe, ishte ‘bebi im’, kështu e quaja. Reagonte si fëmijë, ishte kokëfortë, por ishte i mrekullueshëm… Folëm për herë të fundit të premten, më tha të dua dhe nuk folëm më, sepse ishte mërzitur për diçka. Natën e ngjarjes më thanë se ishte zënë me një vajzë, nuk e di pse. E njihja atë vajzën. Me autorin kanë qenë miq, e dija që njiheshin dhe nuk kishte konflikte mes tyre. Atë natë Jani kishte shkuar vetëm në klub. Kishte shkuar për të pirë një gotë. Më thanë që ka pasur një sherr me tyre, për arsye banale. Më morën në telefon, isha duke fjetur, dhe më thanë zgjohu se kanë vrarë Janin… mendova se ishte shaka, se Jani po më bënte shaka. Të dua sot, tani dhe përgjithmonë… Më le me një unazë dhe me një të dua. Të dua grindaveci im, më prit!
