TIRANË– Një 27-vjeçar nga Kosova është gjobitur me gjobë prej 55 000 lekësh nga Policia pasi u kap duke lëvizur me shpejtësi “skëterrë” prej 197 km/h në tunelin e Kalimashit. I riu udhëtonte me një makinë tip “Audi a7” dhe në momentin e ndalimit ishte dhe pa rripin e sigurimit të vënë. Ai u ndaloi nga forcat blu sapo doli nga tuneli.
Pas aksidenteve tragjike që kanë përgjakuar rrugët e vendit nw muajin mars policia ka zbritur në terren me forca të shtuara të efektivëve të policisë rrugoire për të bërë të mundur evidentimin dhe ndalimin e shkelësve të Kodit Rrugor.
NJOFTIMI I POLICISË:
Qarkullonte në Rrugën e Kombit, në drejtim të Kosovës, me shpejtësi 197 km/orë dhe pa vënë rripin e sigurimit, ndëshkohet me masë administrative 55 000 lekë, drejtuesi i automjetit tip “Audi A7”, shtetas nga Kosova.
Si rezultat i monitorimit intensiv nga punonjësit e Policisë Rrugore, duke përdorur pajisjet e logjistikës bashkëkohore, që ka tashmë në dispozicion Policia Rrugore, në aksin rrugor “Tuneli i Kalimashit-Morinë”, u konstatua mjeti luksoz tip “Audi A7” që qarkullonte me shpejtësi tej normave të lejuara. Pas verifikimeve, rezultoi se 27-vjeçari nga Kosova e drejtonte mjetin, me shpejtësi 197 km/orë dhe pa vënë rripin e sigurimit. Për te dyja këto shkelje, konform Kodit Rrugor, ky shtetas u ndëshkua me masë administrative 55 000 lekë të rinj. Gjithashtu, për shkak të rritjes së fluksit të lëvizjes, gjatë fundjavës që lamë pas, shërbimet e Njësisë për Sigurinë e Autostradës “Milot-Morinë”, kanë intensifikuar kontrollet, duke përdorur mjetet inteligjente, me qëllimin e vetëm, parandalimin e aksidenteve rrugore. Gjatë kësaj fundjave, janë evidentuar dhe ndëshkuar me masat administrative përkatese: 357 drejtues mjetesh, për qarkullim me shpejtësi mbi normën e lejuar. Për 41 prej tyre, është caktuar edhe sanksioni plotësues, pezullim i lejes së drejtimit; 70 drejtues mjetesh, për parakalime të gabuara; 3 drejtues mjetesh, për drejtim të mjetit, nën efektin e alkoolit. Në të gjithë gjatësinë e autostradës “Milot-Morinë”, vijojnë kontrollet me makina inteligjente, radarë automatikë, dronë, kamera dhe alkool-testues, me qëllim parandalimin e aksidenteve rrugore
