TIRANË– Këshilli i Lartë i Prokurorisë (KLP) do të zgjedhë këtë të premte drejtuesin e ri të Strukturës së Posaçme Kundër Korrupsionit dhe Krimit të Organizuar (SPAK). Mbledhja do të nisë në orën 10:00 dhe pritet të zgjasë 120 minuta.
Në garë për kreun e ri të SPAK, që të do jetë dhe pasuesi i Arben Krajës pas përfundimit të mandatit të tij 3-vjeçar janë, Adnan Xholi, Altin Dumani dhe Edvin Kondili. Të pranishëm në seancën dëgjimore do të jenë dhe përfaqësues nga Ministria e Drejtësisë, Prokurori i Përgjithshëm, Programi OPDAT dhe Delegacioni i Komisionit Evropian.
Intervistat me kandidatët do të regjistrohen me audio dhe video dhe do të zgjasë 30 minuta për secilin kandidat, duke filluar sipas rendit alfabetik. Më pas do të bëhet zgjedhja e kandidatit fitues për pozicionin e drejtuesit të Prokurorisë së Posaçme kundër Korrupsionit dhe Krimit të Organizuar.
Zgjedhja e drejtuesit të ri të SPAK është zhvilluar me tensione dhe përplasje mes ambasadores amerikane në Tiranë Yuri Kim dhe qeverisë shqiptare. Ndonëse pse nuk kanë dalë hapur në ‘betëjë’ me deklarata dhe kundërdeklarata kryeministri Edi Rama dhe Yuri Kim janë ‘përplasur’ në distancë me njëri-tjetrin. Dhe ditën e sotme kreu i qeverisë ‘i vuri kufirin’ diplomates amerikane duke i treguar se drejtuesin e ri të SPAK nuk e zgjedh as qeveria e as ambasada por anëtarët e KLP-së të cilëve u kërkoi të bëjnë detyrën pa ndikime. Ndërkohë më herët ambasadorja Kim në një postim në Twitter kërkoi që të mos cënohet puna e KLP-së dhe të mos minohet Reforma në Drejtësi.
