KOSOVË– Presidentja e Kosovës Vjosa Osmani është shfaqur ditën e sotme për herë të parë që pas marrjes së detyrës me një veshje ushtarake duke folur para ushtarëve të Forcave të Sigurisë së Kosovës në Istog. Osmani u bëri thirrje ushtarëve që të jenë në gatishmëri dhe vigjilentë.
Gjatë fjalës së saj Komandantja Supreme e Forcave të Sigurisë së Kosovës tha se më shumë se kurrë, Kosovës sot i nevojitet që trupat e saj ushtarake të tregojnë devotshmëri e përkushtim ndaj atdheut. Deklaratat i bëri gjatë fjalimit të përvitshëm para FSK-së.
“Viti që po lëmë pas u përcoll me sfida jo vetëm për ne, por edhe për botën. Duhet të jemi të vetëdijshëm që sfidat do të rriten krahas me përpjekjet për ta sfiduar paqen dhe rendin botëror nga regjimet autoritare hegjemoniste. Prandaj, më shumë se kurrë na duhet devotshmëri ndaj atdheut, vigjilencë e përkushtim që Republikës t’i bëhemi gardianë. Kjo gatishmëri e juaja për ta mbrojtur vendin nga çdo rrezik na bën krenar secilin… është nder e privilegj sa herë jam në mesin tuaj. Mbi të gjitha djemtë e vajzat e forcës sonë janë të gatshëm për të mbajtur integritetin territorial e sovranitetin e shtetit tonë… Ju shquheni për përkushtimin ndaj vendit, për nivelin profesional, për disiplinë e përkushtim ndaj ndaj detyrës, për nderin ndaj vendit tuaj. Kjo na bën krenar ne si shtet”, u shpreh ajo.
Deklaratat e presidentes së Kosovës por dhe veshja e saj ditën e sotme vjen në një kohë kur tensionet mes Kosovës dhe Serbisë janë shtuar në Veri. Mediat serbe shkruanin ditën e djeshme se ushtria po mobilizohet për çdo rast të mundshëm dhe u shprehen se forca të shumta do të dislokohen në kufi me Kosovën. Nuk dihet ende nëse paraqitja e Osmanit sot me veshje ushtarake është një mesazh për Serbinë dhe presidentin serb Aleksandër Vuçiç për të treguar forcën dhe gatishmërinë e çdo ushtari apo ishte një rastësi por është e sigurt se sot Vjosa Osmani tërhoqi vëmendjen e mediave dhe jo vetëm, të cilët nuk nguruan ta krahasonin me presidentin ukrainas Volodymyr Zelensky, i cili që pas pushtimit të vendit të tij nga Rusia shfaqet gjithmonë i veshur me rroba ushtarake dhe i “zhveshur” nga kostumi presidencial.
