KUÇOVË– Kryetari i Partisë së Lirisë Ilir Meta ka prezantuar mbrëmjen e sotme në Kuçovë kandidatin e opozitës për këtë bashki Lefter Maliqi. Gjatë fjalës së tij nuk munguan as batutat, kështu Meta e krahasoi Maliqin me një vullkan që sipas tij vetëm me Sali Berishën krahasohet për energji.
Ilir Meta: Lefteri është vullkan, edhe kryetar komune ka bërë gjithçka për tu dëgjuar zëri, për të zhvilluar atë zonë. Edhe në parlament, i vetmi që ishte Lefteri dhe njëkohësisht me këtë mundësi që po i jepni Lefterit, të jeni të sigurt që bashkia e Kuçovës mund të mos jetë në atë 10-shen e parë sa i takon popullsisë, por për tu dëgjuar zëri i Kuçovës do jetë e para. Ka një vendosmëri që vetëm me atë të Berishës krahasohet. Më tha sot ti bësh shumë të fala Lefterit dhe mezi po pres të shkoj në Kuçovë se unë mendoj se ka ardhur koha që Kuçova të tregojë qytetarinë e saj.
