Kuvendi miratoi ndryshimet në ligj për drogërat sintetike, Balla: Kërcënimi i tyre, këmbanë alarmi që na vë para përgjegjësisë. Do të vijojmë me masat ndëshkuese
Duke e konsideruar si një këmbanë alarmi, rrezikun që paraqesin drogat sintetike, ai shton se vihet para përgjegjësisë për të vepruar, pa humbur kohë me masa parandaluese.
Balla thekson edhe njëherë në reagimin e tij, se Ministria e Brendshme dhe Policia e shtetit do të vijojnë me të gjitha masat parandaluese dhe ndëshkuese në kuadër të Paketës së Sigurisë në Shkolla.
Reagimi i Ministrit të Brendshëm, Taulant Balla:
Kuvendi miratoi dje ndryshimet në ligjin “Për barnat narkotike dhe lëndët psikotrope” duke përfshirë edhe propozimin tonë për ndalimin e peroksidit të azotit, bashkë edhe me substanca apo përbërës të tjerë të identifikuara në periudha të ndryshme nga Instituti i Policisë Shkencore.
Ndalimi me ligj i përdorimit të peroksidit të azotit, përveç përdorimeve të autorizuara të ti në fushën e mjekësisë dhe industrisë ushqimore, ishte një angazhim që ndërmorëm menjëherë pas rezultateve të para të operacionit të Policisë së Shtetit “Tempulli”, në kuadër të Paketës së Sigurisë në Shkolla.
Gjatë këtij operacioni kombëtar kundër shpërndarësve të lëndëve narkotike, u konstatuan në Shqipëri lëndë narkotike të panjohura më parë si dhe përdorimi në masë i peroksidit të azotit nëpër lokalet e natës nga të rinjtë (në formën e tullumbaceve me gaz), e për pasojë rrezikun e abuzimit dhe të pasojave të rënda për shëndetin e adoleshentëve.
Bazuar në këto të dhëna shqetësuese ju drejtova Komisionit të Shëndetësisë për të përditësuar listën e barnave narkotike dhe substancave psikotrope, me përfshirjen në këtë listë të substancës N2O.
Prej atij momenti me deputetët e Komisionit të Punës, Çështjeve sociale dhe Shëndetësisë dhe grupet e punës nga dy ministritë, Shëndetësia e dhe Brendshmja, u punua me shumë përkushtim për ta përmbyllur me votimin e djeshëm në Kuvend.
Në fillim të këtij viti shkollor, filluam një luftë si asnjëherë tjetër më parë ndaj shpërndarësve të lëndëve narkotike, e cila vazhdon çdo ditë me më shumë se 500 persona të arrestuar/proceduar deri më tani.
Lufta kundër krimit në tërësi dhe krimit të organizuar në mënyrë të veçantë, si dhe përmirësimi i sigurisë publike mbeten prioriteti ynë kryesor.
Droga përbën një plagë sociale për shoqërinë dhe një rrezik gjithmonë e në rritje për rininë dhe të ardhmen tonë. Asnjë vend nuk është imun ndaj kërcënimit të drogës, po ashtu edhe Shqipëria po përballet fort me të.
Jemi të vetëdijshëm se një nga sfidat më të mëdha me të cilat do të duhet të përballemi në të ardhmen e afërt është lufta ndaj drogave sintetike, të cilat prodhohen me kosto të ulët e për pasojë janë më të aksesueshme nga përdoruesit, kryesisht moshat e reja por jo vetëm.
Drogat sintetike janë shkaku kryesor i vdekjeve të qytetarëve të grup moshës 18 deri në 49 vjeç në Shtetet e Bashkuara të Amerikës. Rreth 110.000 amerikanë humbën jetën vitin e kaluar për shkak të drogave.
Ndër ta, 71,000 për shkak të mbidozës nga drogat opioide sintetike si fentanili në vitin 2021, krahasuar me pothuajse 58,000 në 2020.
Kambanat e alarmit që vijnë nga SHBA lidhur me kërcënimin që paraqesin drogat sintetike na vënë përpara përgjegjësisë për të vepruar, pa humbur kohë, me marrjen masave të nevojshme institucionale, parandaluese dhe ndëshkuese, përfshirë në rrafshin social dhe shëndetësor për të shmangur pasoja të dëmshme në të ardhmen.
Siç ngriti alarmin Sekretari amerikan i Shtetit Blinken në fjalën e tij për krijimin e Koalicionit Global kundër drogave sintetike, “nëse nuk veprojmë së bashku me urgjencë të ashpër, më shumë komunitete në mbarë botën do të përballojnë kostot katastrofike që tashmë po prekin kaq shumë qytete amerikane..”
Parandalimi është thelbësor për të përballuar në kohë pasojat fatale të drogave sintetike te fëmijët tanë, familjet apo komunitetet e prekura pasi dhimbja që shkaktohet nga këto humbje jete dhe problemet e qindra personave të tjerë që do të vuajnë nga abuzimi me droga të ndryshme është alarmues.
Në këtë kontekst, Policia e Shtetit në bashkëpunim me të gjitha agjencitë e tjera ligjzbatuese, do të vijojë të marrë masave për ngritjen dhe funksionimin Sistemit të Paralajmërimit të Hershëm mbi substancat e reja psikotrope.
Kjo njësi e posaçme inteligjence dhe koordinimi ndërinstitucional e ngritur pranë Policisë së Shtetit do të veprojë për identifikimin e drogave dhe substancave psikotrope që përbëjnë kërcënim për shëndetin publik, përfshirë ato të evidentuara nga vendet e tjera dhe institucione ndërkombëtare, si Bordi Ndërkombëtar për Kontrollin e Narkotikëve dhe Agjencia e Drogave e Komisionit Evropian, sipas modeleve më të mira evropiane të Early Warning System.
Kjo njësi do të jetë mekanizmi iniciues për përditësimin e rregullt të listës së drogave dhe substancave psikotrope.
Krahas sa më sipër, Ministria e Brendshme dhe Policia e shtetit do të vijojnë me të gjitha masat parandaluese dhe ndëshkuese në kuadër të Paketës së Sigurisë në Shkolla.
Dëshiroj të falënderoj mediat, në mënyrë të vecantë televizionet kombëtare, emisionet e tyre investigative, të gjithë gazetarët që u angazhuan, po ashtu dhe ekspertët, mjekët e kushdo që ngriti zërin për ndalimin e këtyrë lëndëve të dëmshme për shëndetin e të rinjve.
