SHKODËR– Këshilli Bashkiak i Shkodrës ka miratuar ditën e sotme buxhetin e vitit 2023 dhe planin buxhetor afatmesëm 2023-2025. Gjatë fjalës së tij para këshilltarëve kryebashkiaku Bardh Spahia tha se infrastruktura rrugore dhe turizmi do të marrim pjesën më të madhe të fondeve vendore.
Bardh Spahia: Infrastruktura do pësojë transformim. Çdo investim do të nisë e mbyllet brenda një viti buxhetor, nuk do ketë më zvarritje të punimeve. Shkodra nuk mund të kuptohet pa turizmin, ndaj investimet do të shkojnë paralel me shërbimet në pikat turistike në luginën e Kirit, Theth, Velipojë, etj.
Po ashtu gjatë fjalës së tiuj kreu i bashkisë së Shkodrës kërkoi më shumë vëmendje nga qeveria qëndrore të cilën e akuzoi për mungesë fondesh dhe investimesh. Sipas Spahisë Shkodra merr 7 herë më pak fonde për investime se bashkia e Korçës.
Bardh Spahia: Shkodra ka marrë nga qeveria qendrore 7 here me pak fonde se sa Korça dhe Elbasani, 10 herë më pak se Durrësi dhe 5 herë më pak se Vlora dhe e gjitha kjo nuk mund t’i atribuohet mungesës së kapaciteteve por një qasjeje diskriminuese për një territor të tërë. Rikonstruksioni i rrugës Tiranë – Shkodër si aksi kryesor që do të kishte një impakt themelor në përmirësimin e aksesit duke i dhënë zhvillim të qenësishëm të gjithë rajonit, ka vite që kërkohet për t’u realizuar. Shkodra me 3 lumenj që e rrethojnë vijon të ketë urat ndërlidhëse të viteve 90 apo më të vjetra. Këto ura janë lidhja kryesore e qytetit në hyrje dhe dalje dhe investimet për rikualifikimin e tyre janë investime që duhet të merren përsipër nga Qeveria
Buxheti i Bashkisë Shkodër për vitin 2023 kap vlerën e 3.2 miliardë lekëve, nga të cilat 876 milion do të sigurohen nga të ardhurat vendore.
