TIRANË– Biznesmeni i njohur Pëllumb Salillari ka rënë pre e një mashtrimi. Ngjarja ka ndodhur mbrëmjen e 5 janarit rreth orës 22:30 ku në aplikacionin signal në telefonin e biznesmenit Pëllumb Salillari, pronar i kompanisë ndërtuese salillari SHPK mbërriti një mesazh nga një kontakt me emrin “Edi”. Biznesmeni është pergjigjur pas disa minutash me fjalët “mire shef si jeni?”, duke treguar se e ka njohur dërguesin e atij mesazhi. Nga ana tjetër i shkruajnë “doja me të thënë dicka, por po i them dikujt tjetër”. “News 24” raporton se biznesmeni në këtë moment ka njoftuar policinë.
Pas aplacionit “Signal” Policia zbuloi se fsheheshin Jasmin Pepaj, Rezart Pepaj e Sherif Kadroviç, të arrestuar që prej 7 janarit në zonën e Liqenit të Thatë në Tiranë. Tre të rinjtë, të gjithë me origjinë nga Shkodra ia kishin dalë që të ndërhynin në rrjetin Signal dhe të bënin të mundur që të shkruanin mesazh në mënyrë që Salillarit t’i shfaqeshin me dërgues kontaktin me emrin “Edi”.
Numri që ata përdornin ishte një numër anglez që ishte marrë për të zhvatur para nga biznesmenë të ndryshëm.
Pas konsultimeve me Policinë Salillari vijoi bisedën me mashtruesit ku dhe la takim me ta, me pretendimin se do u jepte paratë që ata i kishin kërkuar.
Pëllumb Salillari: Më thuaj të lutem pa problem.
Edi: Ia jep dot robit 150 000 euro dhe rregullohemi.
Për të bërë të mundur arrestimin e mashtruesve Salillari udhëzohet të lërë takim me ta. Me vendim të prokurorisë, u tërhoq nga llogaria e Ministrisë së Brendshme shuma prej 150 000 eurosh, brenda së cilës u vendos GPS, për ta gjurmuar. Në momentin e takimit, sikurse ishte lënë mes palëve, mbërrin një person në banesën e Salillarit dhe merr lekët. Në momentin kur të dyshuarit po largoheshin policia ndërhyri dhe bëri arrestimin.
Më pas gjatë kontrolleve në banesat e tyre u gjetën shuma të konsiderueshme parash mbi 120 000 euro të dyshuarit nuk i justifikojnë dot dhe ka dyshime se këtë aktivitet kriminal e kanë kryer edhe ne raste të tjera.
