LEZHË– Është zbardhur sulmi ndaj drejtorit të Operatorit të Shpërndarjes së Energjisë Elektrike, Edmir Përndreca në Lezhë. Policia bën me dije se si autorë të dyshuar të ngjarjes janë shoqëruar 5 persona, ku për 3 prej tyre është prerë fletë arresti. Në pranga kanërnë rënë Leonard Pepa dhe Sebastiano Malotaj. Ndaj tyre është ngritur akuza e “Goditjes për shkak të detyrës”, ndërsa ka dyshime të forta se mund të jenë porositur nga persona të tjerë për të dhunuar drejtorin e OSHEE në Lezhë.
Ndalimi i tyre është bërë me urdhër të Prokurorisë së Lezhës, por ende nuk shkaku i dhunës ndaj drejtorit të OSHEE. Drejtori i Njësisë së Operatorit të Shpërndarjes së Energjisë Elektrike në Lezhë, Edmir Përndreca thotë se nuk i njohu tre personat që e dhunuan, por shtoi se në atë moment po qarkullonte me makinën e punës.
“Më ndoqën dhe më goditën makinën. Sa zbrita më goditën me leva. Ishin tre persona, por nuk arrita t’i identifikoj,”-deklaroi ai për Policinë nga spitali i Traumës.
Ngjarja ndodhi më datë 30 nëntor. Sulmi vjen pas itensifikimit të kontrolleve të OSHEE, për vjedhje apo ndërprerje të energjisë elektrike ndaj abonteve debitor. Autorët besohet se kanë ndjekur lëvizjet e drejtorit të OSHEE dhe më pas i bënë pritë, duke i përplasur mjetin dhe më pas e qëlluan me sende të forta.
