TIRANË– Meri Kumbe, kandidatja e propozuar për ambasadore në Izrael po raporton këtë të premte në Komisionin për Politikën e Jashtme në Kuvend për planin e saj nëse zgjidhet në krye të selisë diplomatike në Izrael. Por kjo dëgjesë nuk ka kaluar pa debate mes kryetares së Komisionit Mimi Kodheli dhe deputetit demokrat Tritan Shehu. Teksa ky i fundit pyeti Kumben se çfarë mendon për kalimin e ambasades në Jerusalem, Kodheli ndërhyri duke “këshilluar” Kumben që të mos përgjigjet. Kjo solli përplasje dhe ironi mes Shehut dhe Kodhelit në rrafshin politik.
DEBATI:
Tritan Shehu: Me çfarë synimi shkoni atje, si e shikoni transferimin e ambasadës në Jerusalem?
Mimi Kodheli: Ju ftoj të mos i përgjigjeni kësaj pyetje, ju e merrni vetë vendimin tuaj.
Tritan Shehu: Jo, po shkelni rregulloren! Jemi komision politikë, dua përgjigjen time! Po ngelni në klasë, me nota pakaluese.
Mimi Kodheli: Po, herën tjetër mos më vër notë kaluese. Edhe ke të drejtë prandaj ne po qeverisim për dhjetë vite, ju keni kaq kohë që ngelni, prandaj duhet të mbani shënime! Pastaj unë nuk thashë mos iu përgjigj, por e ftova se nuk kemi edhe kohë, na vjen kandidati tjetër. Patjetër, do ta dëgjojmë, vetëm protagonistin mos e bëni, keni mundësi ta bëni gjatë gjithë jetës suaj
Meri Kumbe: Në fakt z. Ministër u dha përgjigja nga diskutimet këtu. Ju vlerësoj për eksperiencën. Ambasadori është një personalitet me integritet që përfaqëson zërin e kombit shqiptarë në qëndrimet politike. Ambasadori nuk shkon atje me qëndrim personal.
