TIRANË– Moti i keq është rikthyer sërish. Reshjet e dendura të shiut të rëna prej natës së mbrëmshme dhe të vijuara gjatë gjithë kësaj të mërkure kanë sjellë probleme të shumta në disa zona të Shiqipërisë. Drejtoria e Përgjithshme Detare paralajmëroi se duke filluar nga mbrëmja e sotme e deri më 17 mars, do të ketë një përkeqësim të motit që do të shkaktojë stuhi në det. Për këtë shkak, tragetet nuk do të nisen nga Porti i Durrësit drejt Barit në Itali dhe anasjelltas.
NJOFTIMI:
Era do të jetë në drejtimin veriperëndim – verilindje në forcën e detit deri 5-7 bft me shpejtësi ere deri 15-25 m/s dhe lartësi dallge deri 2.00 -2.50 m. Për shkak të përkeqësimit të kushteve atmosferike, ditën e sotme nuk do të ketë nisje të trageteve nga Porti i Durrësit drejt Barit dhe anasjelltas. Me qëllim parandalimin e çdo situate të papritur për shkak të kushteve atmosferike kërkojmë bashkëpunimin e të gjithë subjekteve që ushtrojnë veprimtari në fushën e detarisë, për të marrë të gjitha masat e nevojshme për sigurimin e mjeteve në port dhe rritje e gatishmërisë së ekuipazhit në mjetet lundruese.
Po ashtu dhe kapiteneria e Vlorës njofton për pezullimin e lundrimit të anijeve të vogla në det duke filluar nga mbrëmja e sotme deri më datë 17 mars për shkak të përkeqësimit të motit gjatë natës.
NJOFTIMI:
Në bazë të parashikimit për situatën hidrometeorologjike të përkeqësuar në gjirin e Vlorës dhe jashtë saj gjatë datës 16-17 mars 2023 duke filluar nga ora 22.00 datë 15 mars në drejtimin veri-veriperëndim dhe verilindje në forcën deri 5-6 bft me shpejtësi ere deri 15m/s, dhe lartësi dallge deri 2.00m brenda Gjirit të Vlorës dhe jashtë Gjirit të Vlorës në forcën 6-7 bft me shpejtësi ere deri 25m/s dhe lartësi dallge nga 1.50 deri 2.50 metra, mjetet e vogla lundruese dhe ato të peshkimit do të pezullohen deri në përmirësimin e kushteve hidrometeorologjike. Anijet e transportit ndërkombëtar detar do të vazhdojnë të operojnë normalisht sipas destinacioneve. Përmirësimi i situatës hidrometeorologjike të përkeqësuar në Gjirin e Vlorës dhe jashtë saj për mjetet e vogla lundruese dhe të peshkimit do të jetë mbas datës 17 mars 2023 ora 6:00.
