KUÇOVË– Pesëmbëdhjetë banesa janë përmbytur në lagjen “1 Maji” në Kouçovë pas reshjeve të dendura të shiut që përfshinë vendin një natë më parë. Banorët kanë treguar se uji që u vërshoi në shtëpi ka prishur gjithçka, që nga orenditë e deri tek elektro-shtëpiaket. Sipas tyre, shkak për këto përmbytje nuk është natyra por bllokimi i koletorëve, të cilat nuk janë pastruar për vite me radhë.
Ata kanë kërkuar ndihmë financiare nga shteti pasi nuk i përballojnë dot dëmet. Ndërkohë përmes një prononcimi për mediat drejtori i Zhvillimit Rural në Bashkinë Kuçovë, Nazmi Sula, ka pohuar se reshjet e rëna dje kanë dëmtuar në përgjithësi kulturat një vjeçare, siç janë gruri e perimet si dhe kulturat dru-frutore. Sipas Sulës, dëmi i shkaktuar në grurë ka qenë në masën 100%.
Sula bën me dije se në fshatin Perondi është dëmtuar një sipërfaqe rreth 60 hektar, në fshatin Magjatë 50 hektar dhe në fshatin Gorraj 45 hektar, dhe kjo ka ndodhur pikërisht kur pritej që gruri të korrej dhe të magazinohej javën që vjen.
