Qarku i Lezhës është një nga qarqet më të prekura nga moti i keq që ka përfshirë vendin prej shtatë ditësh. Qindra hektarë tokë bujqësore, rrugë e banesa vijojnë të jenë ‘nën pushtetin’ e ujit. Torovica prej ditësh qëndron e rrethuar nga uji dhe banorët shprehen të shqetësuar për këtë situatën. Një banor tha se për të marrë ushqimet dhe ilaçet detyrohen t’i bien nga mali pasi rruga Torovicë-Lezhë vijon të jetë e bllokuar. Në këtë zonë janë ende 124 familje të izoluara pasi uji që shkon deri në 1 metër u ka rrethuar banesat.
“Ka 7 ditë që jemi përmbytur, nuk kemi ku të marrim ushqimet. Duhet t’i bie nga mali, ju e shihni vetë. Mua më bëri përshtypje Rama dhe kryebashkiaku që tha se nuk ka probleme në zonën e Lezhës, desha t’i komentoja por ju i shihni vetë tani. Unë sot kam kaluar nga mali, dje shkova nga mali për të shkuar në Shkodër, është një metër ujë. 220 metra është rruga. Për ushqimet këtu i keni, ushqimet e kafshëve i keni në ujë. Kemi nevojë edhe për bukën tonë, për kafshët dhe për nxënësit për fëmijët, nuk po shkojnë në shkollë. Vit për vit, prej 7 vitesh ndodh e njëjta gjë. Ja fiks 124 familje që janë të izoluara”, tha banori.
Në lidhje me situatën ka reaguar dhe deputetja e Partisë Demokratike Lindita Metaliaj, e cila ka shkuar sërish në zonat e përmbytura ditën e sotme. Ajo ka kërkuar që të shpallet gjendja e fatkeqësisë natyrore dhe të nisë dëmshpërblimi i banorëve të prekur. Ajo tha se zona është tërësisht e bllokuar dhe se banorët kanë nevojë për medikamente dhe ushqime.
“Situata është më e rëndë seç duket. Jemi në ditën e 4 kjo zonë është totalisht e bllokuar. Qytetarët janë pa asnjë lloj mbështetje, kanë nevojë për ushqime dhe ilaçe. Moti është ftohur. Dhe ditën e djeshme, për të kryer ritet e fundit mortore të një zonje, ishte e nevojshme të vinin forcat e ushtrisë. Unë shpresoj që shteti t’i vërë gishtin kokës dhe të shohë banorët dhe të shpallë gjendjen e emergjencës së fatkeqësisë natyrore. Ata kanë nevojë më shumë se kurrë sot për shtetin dhe institucionet vendore dhe qendrore, tha Metaliaj.
Prej ditësh Shqipëria gjendet ‘nën pushtetin’ e motit të keq që ka gjunjëzuar vendin. Qarqet më të prekura janë Shkodra dhe Lezha ku ka ende banesa, rrugë dhe toka bujqësore të përmbytura. Dhe në Lezhë situata vijon të mbetet e rëndë me reshjet e shiut që nuk kanë ndalur. Dhe Durrësi e Vlora kanë raportuar situata të rënda për shkak të përmbytjeve. Në Durrës dalja nga shtrati e lumit Ishëm solli përmbytje në zonën e ish-Kënetës dhe në Fushë-Krujë. Ndërsa në Vlorë Kapiteneria ka urdhëruar ndalimin e daljes në det të varkave të peshkimit.
