TIRANË– Ministrja e Turizmit dhe Mjedisit Mirela Kumbaro pas mbledhjes së qeverisë ka bërë të ditur se janë miratuar amendimet për zhurmat në mjedis. Kështu fashat orare do të jenë nga ora 12 e drekës deri në 12 të natës. Më pas, në përputhje me hartën, policia do të penalizojë subjektet që nuk respektojnë normat. Kumbaro u pyet nga gazetarët nëse kështu po pengojnë biznesnet por ministrja tha se nuk po shpikim rrotën por sqaroi se muzika do të lejohet në ato zona ku nuk pushohet.
Mirela Kumbaro: Miratuam amendimet për zhurmat në mjedis. Edhe një vit më parë, një nga gjërat që kishim më shumë problem ishte ndotja akustike për shkak të muzikës së lartë në lokale e restorante. I dhamë zgjidhje dhe bëmë amendimin në ligjin për zhurmat. Do e miratojmë në Kuvend, do të kemi fashë orare më të kufizuar dhe një pjesë të Policisë së Shtetit që do të kontrollojë ndotjen akustike dhe oraret. Me hyrje në fuqi të këtij ligji, bashkitë do të përcaktojnë hartën e zhurmave, që do të thotë, do të caktohen zonat që duhet të jenë të qeta dhe ato ku mund të zhvillohen aktivitete. Kjo i jep zgjidhje topit që hidhej sa tek mjedisi, sa tek policia e tek shëndetësia. Fashat orare do të jenë nga ora 12 e drekës deri në 12 të natës. Më pas, në përputhje me hartën, policia do të penalizojë subjektet që nuk respektojnë normat. Jemi munduar të respektojmë dhe hapësirat për jetën e natës.
Pyetje: A mendoni që pengoni bizneset sepse edhe vitet e shkuara kanë pasur ankesa pasi klientet largohen nga klubet kur nuk ka muzikë?
Mirela Kumbaro: Normat nuk kanë qenë të rregulluara, kemi pasur akte nënligjore, por nuk ka qenë e lartë kompetenca, se kush e kontrollonte këtë gjë. Bashkitë do të kenë detyrimin të caktojnë se cilat janë ato zona që do të zhvillohen aktivitetet me muzikë pas mesnatës. Që do të thotë do të jetë larg zonave ku pushohet e qetësohet. Nuk po shpikim rrotën, po ndjekim rregullat që zbatohen në vendet e tjera të BE-së.
