TIRANË– Po zhvillohet me debate të forta seanca e sotme plenare ndërkohë që jashtë parlamentit opozita po zhvillon protestë. Këtë herë në debat u përfshinë deputeti demokrat Xhelal Mziu dhe drejtuesja e seancës Ermonela Felaj. Mziu ka kërkuar që në Kuvend të futen të gjithë deputeët e PD-së që mund të jenë përjashtuar nga seancat ose në të kundër seanca të ndërpritet. Por përgjigjen e mori menjëherë nga drejtuesja e seancës Felaj, e cila tha se Byroja e Kuvendit ka vendosur që të lërë në fuqi përjashtimin e deputetëve.
Xhelal Mziu: Ata duhet të ishin të pranishëm në këtë mbledhje. Nuk u plotësua as kuorumi dhe nuk duhej të vazhdonte as mbledhja. Do të kërkoja që kolegët që kanë bërë ankimim të jenë pjesë e seancës, ose kjo seancë të ndërpritet. Të mbyllet seanca deri në momentin që Byroja të mblidhet e të vendosë për ankimimin e tyre.
Ermonela Felaj: Kuorumi është plotësuar, zoti Mziu keni qenë pjesë dhe është lënë në fuqi vendimi i Sekretariatit për përjashtimin e katër deputetëve, zoti Sali Berisha, Flamur Noka, Belind Këlliçi dhe Edi Paloka.
