TIRANË– Është ndarë nga jeta në moshën 102-vjeçare ikona e klubit të bardhëebluve, ‘Nona e Tirones’ Nezihat Stërmasi, gruaja e sportistit të talentuar, ikonës së klubit të Tiranës Selman Stërmasi. Nezihati ishte vetëm 14-vjeçare, kur e njohu Selman Stërmasin nga hyrje daljet familjare të dy shtëpiave, të cilat kishin miqësi të vjetër bashkë. Në vitin 1936 fejesa midis Nezihatit dhe Selmanit u shpall, për t’u kurorëzuan me një martesë në vitin 1939.
Një vit më pas Nezihati u bë nënë e një vajze bukuroshe, të cilës iu dedikua me gjithçka mbarte shpirti saj rinor. Këto ishin vite të bukura, ku gëzimi dhe harmonia s’kishin kufi. Selmani ishte në kulmet e karrierrës si drejtues i bardhebluve të Tironës, në gjirin e të cilës ishin emra të mëdhenj si Lushta e Kryeziu.
Pas përfundimit të Luftës së Dytë Botërore dhe çlirimit të Shqipërisë, familja Stërmasi do të përjetonte persekutimin komunist, ku Nezihati do të ishte përkrah bashkëshortit të saj Selman Stërmasi, deri në çastet e fundit të jetës së këtij gjigandi të futbollit kryeqytetas.
