SARANDË– Pesë persona janë vënë nën hetim këtë të premte nga Policia e Sarandës pasi akuzohen për ndërtime pa leje. Sipas Policisë pesë personat janë konstatuar duke kryer punime të ndryshme ndërtimi, pa lejen e organeve kompetente.
NJOFTIMI I POLICISË:
Procedohen penalisht 5 shtetas të tjerë që ndërtuan pa lejen e organeve kompetente, në zona të ndryshme të rrethit të Sarandës. Si rezultat i kontrolleve dhe i verifikimeve në terren, në vijim të operacionit “Coastline”, me qëllim parandalimin, konstatimin dhe goditjen e paligjshmërive në fushën e ndërtimeve, shërbimet e Komisariatit të Policisë Sarandë kanë konstatuar dhe goditur 5 raste të tjera të paligjshmërive në këtë fushë, për të cilat u referuan materialet në Prokurori ku nisi procedimi në gjendje të lirë për shtetasit: A. B., 39 vjeç, L. V., 62 vjeç, K. M., I. Q., 41 vjeç dhe G. P., 28 vjeç. Gjatë kontrolleve të kryera nga shërbimet e Policisë, në zona të ndryshme të rrethit të Sarandës, këta shtetas janë konstatuar duke kryer punime të ndryshme ndërtimi, pa lejen e organeve kompetente. Operacioni policor “Coastline”, për goditjen e krimeve kundër mjedisit, vijon. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
