Kuvendi i Shqipërisë miratoi ditën e enjte një ndryshim në ligjin “Për shtetësinë”, për t’u krijuar mundësinë talenteve të sportit që kanë lindur e jetojnë jashtë Shqipërisë që të pajisen me pasaportën shqiptare.
Pra, e thënë me thjeshtë, shtetësinë shqiptare mund ta marrë çdo talent edhe kur nuk e ka mbushur moshën 18 vjeç.
Një moment të tillë e ka njoftuar edhe kryeministri Edi Rama përmes një postimi në rrjetet sociale. Kreu i qeverisë shprehet se një nismë e tillë u jep mundësinë të rinjve që të veshin fanellën e kombëtares kuqezi në çdo disiplinë sportive.
#KrenarpërShqipërinë🦅🇦🇱Tanimë me ndryshimet e miratuara në ligjin “Për shtetësinë” nga Kuvendi i Shqipërisë, me propozim të Qeverisë, u krijohet mundësia talenteve të sportit që kanë lindur e jetojnë jashtë Shqipërisë, që të pajisen me pasaportën shqiptare edhe kur nuk kanë mbushur moshën 18 vjeç🇦🇱#VetëmPërpara➡️🇦🇱’”, shkruan Edi Rama në llogarinë e tij zyrtare në rrjetin social Facebook.
Një ndryshim i propozuar nga qeveria që lehtëson ndjeshëm procedurën, veçanërisht lojtarët e moshave të kombëtares së futbollit. Për
shkak se burokracitë ishin bërë pengesë e madhe për shumë lojtarë që të pajiseshin me dokumentacionin e nevojshëm.
Në të shkuarën nuk kanë munguar rastet kur futbollistë të caktuar kanë pritur me javë, muaj dh evite, duke humbur ndeshjet zyrtare, pikërisht për shkak të çështjeve burokratike.
Por ky ndryshim në ligj u krijon mundësinë që tashmë të marrin shtetësinë shqiptare, në momentin që federatat sportive do të konfirmojnë interesimin për talentet nën 18 vjeç. Me qëllim që të jenë pjesë e skuadrave përfaqësuese.
Deputeti i Partisë Demokratike, Bujar Leskaj ishte i vetmi ligjvënës që votoi kundër për këtë ndryshim në ligj. Mbetet i paqartë pozicionimi i deputetit Leskaj, me një karrierë të gjatë tanimë politike, ish-ministër i Turizmit dhe ish-kryetar i Kontrollit të Lartë të Shtetit.
Ndërsa të gjithë deputetët e tjerë, si nga mazhoranca ashtu edhe nga opozita, kanë votuar pro lehtësimit të procedurave të dhënies së shtetësisë për talentet e sportit që kanë lindur dhe jetojnë jashtë Shqipërisë.
