Dy ditë pasi njoftoi ndryshimet në kabinetin qeveritar, gjatë punimeve të Asamblesë Kombëtare të PS, kryeministri Edi Rama sot ka bërë lëvizjen e radhës.
Kreu i qeverisë i ka dërguar presidentit Bajram Begaj për dekretim emrat e ministrave të rinj.
Rama shkarkoi Olta Xhaçkën nga ministre për Europën dhe Punët e Jashtme dhe emëroi në vend të saj diplomatin Igli Hasani.
Ndryshime pati dhe te Financat ku u largua nga ky post Delina Brahimaj për t’i hapur rrugën Ervin Metes. Brahimaj shkon ministre Shteti për Sipërmarrjen dhe Klimën e Biznesit në vend të Edona Bilalit.
Ogerta Manastirliu u largua nga Ministria e Shëndetësisë dhe Mirëqenies Sociale për të marrë drejtimin e Ministrisë së Arsimit që mbahej nga Evis Kushi.
Te Shëndetësia, Edi Rama emëroi drejtoren e DAP, Albana Koçiu.
Kryeministri Edi Rama riktheu në kabinetin qeveritar Anila Denajn e cila në mandatin e kaluar ka mbajtur postin e ministres së Financave. Denaj u emërua ministre e Bujqësisë në vend të Frida Krifcës.
Risi e këtij kabineti qeveritar është emërimi i Arbjan Maznikut, nënkryetar i bashkisë së Tiranës, ministër i Pushtetit Vendor.
Sakaq, Rama shkriu Ministrinë e Shtetit për Standardet dhe Shërbimet që drejtohej nga Milva Ekonomi.
Ndryshimet në Qeveri:
Ministër i Financave dhe Ekonomisë – Emërohet Ervin Mete; Largohet Delina Ibrahimaj
Ministër Shteti për Sipërmarrjen dhe Klimën e Biznesit – Emërohet Delina Ibrahimaj; Largohet Edona Bilali
Ministre e Shëndetit dhe Mirëqenies Sociale – Emërohet Albana Koçiu; Largohet Ogerta Manastirliu
Ministër i Arsimit dhe Sportit – Emërohet Ogerta Manastirliu; Largohet Evis Kushi
Ministër për Europën dhe Punët e Jashtme – Emërohet Igli Hasani; Largohet Olta Xhaçka.
Ministër i Bujqësisë dhe Zhvillimit – Emërohet Anila Denaj; Largohet Frida Krifca
Ministër i Pushtetit Vendor (Ministri e re): Emërohet Arbjan Mazniku
Ministria e Shtetit për Standardet dhe Shërbimet (Shkrihet) – Largohet Milva Ekonomi
/ Newszone
