Tensionet midis Izraelit dhe palestinezëve kanë ekzistuar që para themelimit të shtetit izraelit në vitin 1948. Mijëra njerëz nga të dyja palët janë vrarë dhe shumë të tjerë janë plagosur në konfliktin e gjatë që zien midis dy palëve gjatë dekadave të fundit.
Dhuna është rritur veçanërisht këtë vit. Numri i palestinezëve – militantë dhe civilë – të vrarë në Bregun Perëndimor të pushtuar nga forcat izraelite është në nivelin më të lartë në gati dy dekada. E njëjta gjë qëndron edhe për izraelitët e të huajt – shumica prej tyre civilë – të vrarë në sulmet palestineze.
Izraeli dhe grupi militant Hamasi kanë qenë të përfshirë në konflikt të armatosur që daton që nga Intifada e Parë Palestineze e vitit 1987, ose kryengritja, kundër pushtimit izraelit të Rripit të Gazës dhe Bregut Perëndimor.
Izraeli e pushtoi Gazën nga Egjipti gjatë luftës së vitit 1967, më pas u tërhoq në 2005. Territori i vogël – shtëpia e rreth 2 milionë palestinezëve – ra nën kontrollin e Hamasit në vitin 2007 pas një lufte të shkurtër civile me Fatahun, një fraksion rival palestinez që është shtylla kurrizore e Autoriteti Palestinez.
Pasi Hamasi mori kontrollin e Gazës, Izraeli dhe Egjipti vendosën një rrethim të rreptë në territor, i cili është në vazhdim. Izraeli gjithashtu mban një bllokadë ajrore dhe detare në Gaza.
Para operacionit të së shtunës, lufta e fundit midis Hamasit dhe Izraelit ishte në vitin 2021, e cila zgjati për 11 ditë dhe vrau të paktën 250 njerëz në Gaza dhe 13 në Izrael.
Sulmi i së shtunës ndodhi në 50 vjetorin e luftës së vitit 1973, kur fqinjët arabë të Izraelit filluan një sulm të befasishëm ndaj Izraelit gjatë “Yom Kippur”, ditën më të shenjtë në kalendarin hebre, më 6 tetor 1973./ Reuters
