Prokuroria e Posaçme kundër Korrupsionit dhe Krimit të Organizuar pohoi të martën se ishte njoftuar se në Gjykatën e Vienës në Austri është duke u kryer procedura e ekstradimit të Stela Gugalles – njëra prej administratoreve të kompanive koncesionare të inceneratorëve që kërkohet nga Shqipëria për veprën penale të korrupsionit.
Sipas SPAK, procedura për ekstradimin nga Austria në Shqipëri e kësaj shtetaseje po kryhet në zbatim të urdhrit të kërkimit ndërkombëtar.
“Për këtë qëllim i është përcjellë Ministrisë së Drejtësisë gjithë dokumentacioni i nevojshëm për procedurën e ekstradimit,” tha zëdhënësja e SPAK, Xhuljeta Krasta.
Çështja për aferën e incineratorit të Elbasanit, për të cilën akuzohet Gugallja, është dërguar për gjykim nga Prokuroria e Posaçme. Së bashku me Gugallen, nën akuzë janë edhe ish-ministri i Mjedisit, Lefter Koka, ish-deputeti socialist Alqi Bllako, gjashtë zyrtarë të tjerë si dhe biznesmenët Mirel Mërtiri dhe Klodian Zoto. Po ashtu, nën akuzë penale janë edhe kompanitë “Albtek Energy” sh.p.k dhe “Integrated Technology Services” sh.p.k.
Sipas hetimit të prokurorisë, të akuzuarit dyshohen se kanë dhënë koncesion në kundërshtim me ligjin, kanë lëshuar dhe pranuar fatura për punime të paqena dhe kanë transferuar paratë e përfituara përmes një rrjeti kompanish false.
E pyetur nga BIRN mbi fazën e procesit të ekstradimit, Krasta tha se “deri në këtë moment nuk ka njoftim nga autoritetet austriake të drejtësisë”. SPAK nuk dha përgjigje nëse kishte njoftim për dy personat e tjerë në kërkim, Mirel Mërtiri dhe Klodian Zoto.
“Nuk kemi më gjë për të shtuar,” u përgjigj Krasta.
Sipas akuzës, zyrtarët e qeverisë përdorën një metodë prokurimi të paparashikuar në legjislacionin për inceneratorin e Elbasanit, ndonëse ishin vënë në dijeni për këtë nga Agjencia e Prokurimeve Publike.
Zyrtarët që morën pjesë në procedura, Etleva Kondi, Jonida Zeqo, Pëllumb Abeshi, Bardhul Çabiri e Serafin Papa, janë nën akuzën e abuzimit të detyrës, ndërsa ish-ministri Koka është nën akuzë të trefishtë për abuzim me detyrën, korrupsion pasiv dhe pastrim parash.
Biznesmenët Mirel Mërtiri, Stela Gugallja dhe Klodian Zoto janë nën akuzë për korrupsion aktiv e pastrim parash. Mërtiri përshkruhet nga Prokuroria si “pronari faktit i shoqërisë “Albtek Energy””, kompani që zyrtarisht është nën pronësinë e partneres së tij, Stela Gugallja./Reporter.al
