SHKODËR– Administratorja e hetelit “Chicago” ku dhe ndodhi helmimi i tre qytetarëve ka reaguar për mediat. Sonila Kruja ka deklaruar se nga ana e stafit restorantit nuk kishte pasur asnjë lloj neglizhence. Ajo shtoi se hoteli prej vitesh bashkëpunon me kompaninë e ujit dhe nuk ka pasur asnjëherë problem. Kruja ndër të tjera deklaroi se kamarieri, i cili nuk e ka besuar se helmimi ka ardhur nga uji e ka provuar dhe vetë atë dhe pas pak dhe ai ka shfaqur shenja helmimi. Administratorja u shpreh se hoteli është në dispozicion të institucioneve që të zbardhet sa më shpejt kjo ngjarja.
Sonila Kruja: Kamarieri që hapi shishen pranë klientëve nuk e ka besuar pasi ky ujë serviret nga lokali ynë prej vitesh dhe nuk ka pasur asnjë lloj problemi. Kamarieri ka konsumuar ujin që pinë klientët dhe më pas edhe ai shfaqi shenja helmimi. Ne kemi njoftuar organet kompetente për zbardhjen e ngjarjes dhe kemi dorëzuar edhe të gjitha kamerat. Jemi të hapur ndaj të gjithë organeve ligjzbatuese për çdo kërkesë. Theksojmë për të gjithë klientët se nga ana e stafit tonë nuk ka patur asnjë lloj neglizhimi.
