Nëse dhe ju i harroni ëndrrat që shihni, tani do ta kuptoni arsyen

Pjesa më e bukur e gjumit janë ëndrrat që ne shohim, sidomos ato të bukurat të cilat na mrekullojnë vazhdimisht. Këto ëndrra janë sa të bukura po aq edhe të mbështjella me mister. Për çdo rast, ato me siguri janë të lidhura ngushtë me mbajtjen në mend, qoftë edhe që të ndihmojnë që kujtimet nga dita e kaluar të bashkohen apo që të harrohen ngjarjet e parëndësishme dhe të padëshirueshme, në mënyrë që truri ynë të mos ngarkohet tepër me të dhëna. Nëse ëndrrat vështrohen në atë mënyrë, atëherë nuk do të ishte as e dëshirueshme t’i kujtojmë. Gjatë pjesëve të ëndrrave nivelet e neurotransmetuesve të serotoninës dhe të noradrenalinës janë shumë të ulëta. Ëndrrat më së shpeshti janë plotësisht të palogjikshme, ndërkaq ngjarjet në to në asnjë mënyrë nuk janë të lidhura. Prandaj, kur përpiqemi që t’i kujtojmë, nuk mundemi të ndjekim ndonjë fill, ndaj imtësitë piktoreske me siguri humbasin në labirintin e pështjelluar të neuroneve.