Seanca plenare e sotme e Kuvendit ka shpërthyer në një përplasje mes kreut të Grupit Parlamentar të PD, Gazment Bardhi, dhe kryetares së Kuvendit, Elisa Spiropali. Diskutimi lidhej me çështjen e mandatit të deputetes socialiste Olta Xhaçka, për të cilën nesër do të zhvillohet seanca në Komisionin e Venecias.
Bardhi akuzoi Spiropalin se po mban të fshehtë draft-opinionin që ka të bëjë me këtë çështje, duke e cilësuar si një veprim të padrejtë ndaj deputetëve të opozitës. Nga ana e saj, kryeparlamentarja iu përgjigj duke theksuar se nuk ka asnjë draft-opinion zyrtar dhe se, sapo të ketë një dokument të tillë, do ta shpërndajë për të gjithë deputetët.
Tensionet në Kuvend vazhduan të thellohen, duke nxjerrë në pah përplasjet politike mbi proceset ligjore dhe transparencën e institucioneve.
Pjesë nga diskutimi:
Bardhi: Draft-opinioni i komisionit të Venecias u është paraqitur juve zonja kryetare. Ju keni njohur grupin parlamentar të PS me draft-opinionin. Ndërkohë që grupin parlamentar të opozitë nuk e keni vënë në dispozicion, që ne të kemi mundësi t’i shohim. Sigurisht që mund të mos ju ketë pëlqyer draft opinioni dhe e keni mbajtur atë të fshehur. E keni detyrim që atë draft-opinion që komisioni i Venecias ju ka dërguar, e keni kërkuar si kryetare e Kuvendit dhe për këtë arsye duhet t’i tradhtoni grupet parlamentare në të njëjtën mënyrë.
Ndodh për herë të parë që delegacioni të përbëhet nga deputetë të mazhorancës. Gjithmonë përbërja ka qenë 4 anëtarë të Kuvendit, 2 nga opozita dhe 2 nga mazhornaca. Dua të di, jemi shpallur armiq të popullit ne nga partia juaj në pushtet? Ka ndonjë motiv të caktuar?
Spiropali: Më jepni mundësi të bëj një sqarim. Nuk ka dokument zyrtar, sapo të vijë, do të ndahet sipas rregullave të komisionit të Venecias dhe jo të Shqipërisë. Shumica s’ka asnjë draft të komisionit të Venecias. Bëhet publik dhe deputetët do e kenë. Zoti Bardhi mos spekuloni. Unë do jem në seancë në bazë të kërkesës që kam bërë.
