U paralajmërua se takimi i 5 shtatorit nuk do të ishte i vetmi. Gazment Bardhi dhe Sali Berisha kanë thirrur në një tjetër takim deputetët e opozitës.
Kryetari i grupit parlamentar të PD ka njoftuar deputetët se takimi do të zhvillohet nesër, e mërkurë, 13 shtator, ora 13:00 në ambientet e Kryesisë së Kuvendit.
Takimi i javës së kaluar shërbeu për “shkrirjen e akujve” mes deputetëve të grupeve në PD, atij të Gazment Bardhit dhe Foltores së Sali Berishës.
“Ky takim ishte i nevojshëm që unë të mos përplasem në Kuvend me Edi Palokën, por të dy të merremi me Edi Ramën. Vendimi i parë që morëm është padyshim rikonceprimi i detyrave dhe përbërjes së komisionit zgjedhor. Do paraqesim në nisje të sesionit ngritjen e tre komisioneve hetimore, për koncesionet PPP dhe problematika në shëndetësi, çështja e dytë ka të bëjë me të dhëna personale të qytetarëve, çështja e patronazhistëve dhe dyshimet për ndërhyrje në sistemin TIMS, dhe së treti jemi njohur me të dhëna sesi zyrtarë publike në konflikt interesi marrin vendime për të pasuruar familjarë dhe miq, dhe komisioni do jetë i fokusuar në shpërdorimin e detyrave”, tha Gazment Bardhi pas tryezës me 43 deputetët.
Në takimin e radhës, mësohet se Bardhi ka ftuar edhe Lulzim Bashën, ftesë e cila është refuzuar nga ky i fundit.
Gjithashtu, ftesë ka edhe për deputetët e Partisë së Lirisë.
Kryetari i PL, Ilir Meta nuk ka konfirmuar ende pjesëmarrjen në këtë tryezë, ndërsa kujtojmë që në takimin e 5 shtatorit nuk mori pjesë asnjë mprej deputetëve të Partisë së Lirisë.
/ Newszone
