Nga data 8 deri më 11 shtator, Java Kulturore Malazeze vjen në Tiranë, duke sjellë kështu një mozaik të pasur arti, muzike, historie dhe kujtese kulturore. Kjo javë, e cila shënon rifillimin e sezonit të dytë të Javëve Kulturore Ndërkombëtare 2025, nismë e Ministrisë së Ekonomisë, Kulturës dhe Inovacionit, premton për të gjithë artëdashësit aktivitete kulturore emocionuese, kujtime dhe reflektime mbi të kaluarën e përbashkët.
Aktivitetet nisin më 8 shtator, me një koncert solo nga pianisti Karlo Gjurgjević që do të organizohet në Teatrin Kombëtar të Operas, Baletit dhe Ansamblit Popullor. Pianisti Gjurgjević do të ofrojë një udhëtim të pasur në botën e muzikës klasike ku do të performojë kryevepra klasike nga Beethoven, Bach, Liszt dhe Chopin. Në fund, ai do të interpretojë një improvizim mbi tema muzikore tradicionale malazeze.
Kurse në datat 9 dhe 10 shtator, në Bibliotekën Kombëtare, Qendra “Sotir Kolea” – Tiranë do të jetë e hapur një ekspozitë dokumentesh me temë “Përfaqësitë Konsullore të Malit të Zi 1880-1914” nga Arkivi Shtetëror i Malit të Zi. Ekspozita paraqet një pjesë të dokumenteve nga fondet e Arkivit Kombëtar të Malit të Zi që lidhen me veprimtarinë diplomatike të Principatës së Malit të Zi në periudhën pas Kongresit të Berlinit 1878 dhe deri në fillimin e Luftës së Parë Botërore. Synimi është që përmes kësaj ekspozite të nxirret në pah vlera e dokumenteve të ruajtura dhe që lidhen me konsujt e nderit.
Për lexuesit dhe jo vetëm, në datat 10 dhe 11 shtator, në Bibliotekën Kombëtare në Tiranë do të hapet një ekspozitë librash të vjetër, hartash dhe kartolinash që trajtojnë temën e Shqipërisë në shekullin XIX dhe në gjysmën e parë të shekullit XX nga Biblioteka Kombëtare “Đurđe Crnojević”. “Udhëzues për Shqipërinë” (Paris, 1930), “Gjuha e Shqiptarëve” (Frankfurt, 1835) dhe “Katër muaj në Shqipëri” (Berlin, 1916), janë vetëm disa nga librat që do të jenë të ekspozuar. Mes kartolinash, do të ketë edhe punime të fotografit të njohur shqiptar Marubi.
Java Kulturore Malazeze do të mbyllet më 11 shtator me një shfaqje teatrale të titulluar “The Virgin Case” nga Teatri Mbretëror Malazez “Zetski Dom” që do të mbahet në ArTurbina në Tiranë, në orën 19:00. Shfaqja tregon jetët e pazakonta të individëve në rajonin tonë dhe nxjerr në pah hipokrizinë dhe mizorinë e shoqërisë, e cila nuk ka ndryshuar shumë deri sot.
Nga muzika te arti skenik, nga dokumentet historike te librat e rrallë, Java Kulturore Malazeze fton publikun, hyrja e të cilit do të jetë falas, të zbulojë një përvojë unike që bashkon kulturën dhe historinë.
Menjëherë pas Malit të Zi, do të organizohet në vendin tonë Java Kulturore e Ganës dhe Arabisë Saudite, të cilat bëhen pjesë e Javëve Kulturore Ndërkombëtare për herë të parë në këtë sezon.
