Anëtari i Kryesisë së Partisë Demokratike, Belind Këlliçi, ndau qëndrimet e tij mbi zhvillimet e fundit politike dhe aktivitetet ndërkombëtare të opozitës shqiptare. Ai theksoi rëndësinë e një turi takimesh të realizuar nga përfaqësuesit e PD-së me partnerë të rëndësishëm ndërkombëtarë, ku spikatën takimet në Strasburg dhe në Shtetet e Bashkuara të Amerikës.
Këlliçi u shpreh se të huajt e kanë cilësuar Shqipërinë si “narkoshtetin e parë në Europë,” duke akuzuar kryeministrin Edi Rama për lidhje me krimin e organizuar dhe drejtimin e një regjimi autokratik. Sipas tij, këto çështje janë bërë pjesë e rëndësishme e diskutimeve në Parlamentin Europian dhe në qarqet ndërkombëtare.
Ai gjithashtu vlerësoi mbështetjen e Partisë Popullore Europiane dhe organizatave të tjera për opozitën dhe liderin e PD-së, Sali Berishën. Për Këlliçin, këto zhvillime tregojnë përpjekjet e vazhdueshme të opozitës për të denoncuar regjimin aktual dhe për të mbrojtur interesat demokratike të vendit.
Është një tur takimesh që është ndërmarrë nga shumë funksionarë të Partisë Demokratike me partnerët tanë kryesorë. Padiskutim, mes tyre spikasin takimet në Shtetet e Bashkuara të Amerikës dhe takimet në Strasburg, të zhvilluara para një muaji, ku 30 deputetët e Partisë Demokratike patën mundësinë të informojnë pjesën dërrmuese të Parlamentit Europian lidhur me narkoshtetin e ngritur në Shqipëri, narkoshtetin e parë në Europë, që drejtohet nga Edi Rama.
Mos harroni takimet e ditëve të fundit, ku unë, së bashku me mikun dhe kolegun Tomorr Alizoti, patëm takime në Berlin. Atje u takuam me deputetë të CDU-së dhe me drejtuesit kryesorë të fondacionit politik të Kristian-Demokratëve Gjermanë.
Ditën e nesërme, së bashku me Albana Vokshin dhe Endri Çenon, do të jemi pjesë e një delegacioni zyrtar në Shtetet e Bashkuara të Amerikës, në samitin vjetor të organizatës botërore të partive të djathta.
Mos harroni rezolutat e miratuara para dy javësh, të cilat ishin shumë të forta në mbështetje të opozitës shqiptare, Partisë Demokratike dhe liderit të saj, kryetarit të PD-së, doktor Berishës. Veçanërisht spikat rezoluta e CDI-së, që e konsideroi Sali Berishën një të burgosur politik, ndërsa Shqipërinë e cilësoi një narkoshtet. Ashtu siç është, Edi Rama u përshkrua si një person i lidhur ngushtë me krimin e organizuar, trafikantët e drogës dhe individë të inkriminuar, ndërsa Shqipëria u quajt një regjim autokratik.
Edi Rama, pasi mbaroi punë me Shqipërinë dhe qeverinë – sipas tij – ka kaluar në “reformimin” e opozitës. Ai ishte i shqetësuar që partia jonë simotër, Partia Popullore Europiane, po mbështeste Partinë Demokratike dhe kreun e saj, Sali Berishën, me një rezolutë, duke penguar kështu reformimin e Partisë Demokratike.
E kuptoni me çfarë megalomanie dhe deliri kemi të bëjmë në këtë rast?
Rezoluta e PPE-së ka kaluar pa asnjë modifikim, pa asnjë germë apo presje të ndryshuar. Ajo u miratua plotësisht, ashtu siç ishte paraqitur nga Partia Demokratike në Asamble.
