MALIQ- Një ngjarje e rëndë ndodhi ditën e sotme në Maliq, ku një 62-vjecar sulmoi bashkëshorten dhe djalin e tij me sende të forta. Pas mbërritjes së policisë në vendngjarje, autori refuzoi të dalë përpara policisë dhe është mbyllur brenda duke hapur zjarr drejt tyre. Pas 8 orësh tentative mëngjesin e sotëm RENEA arriti të futej deri në katin e dytë të banesës së tij ndërsa ai qëndronte i fshehur në papafingo. Pas disa tentativash, RENEA ka mundur që ta lokalizojë autorin, por sërish mes tyre, sipas policisë, ka pasur përplasje me armë, e si pasojë Muçollari ka mbetur i vrarë. Fqinjët zbulojnë se ai vuante nga shëndeti mendor.
“Rreth orës 11 të natës filloi që të qëllonte. Siç më thanë persona të afër të tyre, kishte goditur bashkëshorten me thikë ndërsa të birin me tytën e armës që kishte. Pastaj filluan të shtënat. Ka qenë njeri i qetë, ka pasur shqetësime mendore 6-7 vite më përpara. Por i filluan sërish me vonë. Shqetësimet i ka pasur nga i biri, lozte kumar, drogë. Nuk ka pasur probleme me ne në fshat. Në lagjen tonë s’ka pasur kurrë probleme të tilla”, tha një nga fqinjët.
