TIRANË– Ka nisur me debate të forta mbledhja e Komisionit Qëndror të Zgjedhjeve mes Kryekomisionerit Ilirjan Celibashit dhe përfaqësuesit ligjor të grupit të Enkelejd Alibeajt, Indrit Sefa sa i përket regjistrimit të Partisë Demokratike në zgjedhjet vendore të 14 majit. Sefa ka kërkuar nga kreu i KQZ që dy kërkesat e dorëzuar në KQZ të PD të ndahen nga njëra-tjetra.
Debati:
Ilirjan Celibashi: Jemi këtu edhe pasi KAS rrëzoi ankesën, fjala është për palët pjesëmarrëse. Pikë së pari nëse keni ndonjë deklarim për plotësim e asaj që iu kërkua.
Indrit Sefa: Të njëjtën copë letër, duam të dimë dhe mendimin e komisionerit, siç është rregulli si e do edhe zakoni në KQZ. Të dërgohet projektvendimi për të marrë mendimin.
Ilirjan Celibashi: Është një projektvendim, për rastin e LSHK administrata ka bërë rekomandim. Në rastin e PD nuk ka një propozim të tillë. Në fund të fundit ne do iu dëgjojmë dhe do të vendosim. Komisioneri jep vendimin pas shqyrtimit të projektvendimit për vetë natyrën e çështjes.
Indrit Sefa: Përsëri kërkesë proceduriale, iu kanë ardhur 2 kërkesa të ndryshme, jeni referuar në mënyrë të gabuar, unë jam përfaqësues i PD së Shqipërisë, dua të rregullohet në mënyrë imediate. Janë dy kërkesa me 2 subjekte të ndryshme, por kërkesa duhet që të jetë e veçantë. Kërkoj që të disponohen në dosje shkresat e protokollit.
Ilirjan Celibashi: Lidhur me kërkesën tjetër proceduriale sikurse ju e thatë, ne shqyrtojmë kërkesën e PD-së për tu regjistruar si subjekt zgjedhor. Vendimmarrja do të jetë mbi këtë gjë. Ju po thoni që ka dy kërkesa. Unë një kërkesë do shqyrtoj
Indrit Sefa: Ka dy kërkesa, në rast se ju legjitimoni se ka dy kërkues, është kompetenca juaj në bazë të ligjit që të ndani kërkesat. Duhet të jetë vetëm një kërkues në atë vendimmarrje.
Ilirjan Celibashi: Unë po e them qartë, ka vetëm një kërkues që është Partia Demokratike, legjitimiteti i personit që e dorëzon është tjetër gjë
Indrit Sefa: Keni bashkuar dy kërkesa.
Ilirjan Celibashi: Unë po e them qartë, kërkuesi i vetëm është Partia Demokratike.
