TIRANË– Ka nisur procesi i numërimit të votave për anëtarë të Këshillit Bashkiakë në Tiranë. Raportohet se deri më tani kur janë numëruar 11 nga 941 Qendra Votimi në total kryeson Partia Socialiste me 46.60% të votave ose 32 mandate. Ndërsa koalicioni ”Bashkë Fitojmë” ka siguruar 25.40% të votave, ose 17 mandate.Ndërsa PD e drejtuar nga Enkelejd Alibeaj rënditet e treta me 7.52% të votave, 5 mandate. Partia Social Demokrate deri më tani ka siguruar 4.56% të votave, 3 mandate. Ndërkohë, Partia Republikane 2.40% ka siguruar 1 mandat, PDIU me 2.40% të votave ka siguruar 1 mandat, Nisma Thurje me 2.66% të votave fiton 1 mandat. Lëvizja Bashkë me 2.46% të votave po ashtu siguron një mandat.
Ndërsa në Bashkinë e Kamzës ka përfunduar procesi i numërimit të votave dhe Partia Socialiste rezulton fituese me 19 mandate me 43.09% të votave. ”Bashkë Fitojmë” ka siguruar 11 mandate me 24.98% të votave. Partia Demokratike e drejtuar nga Enkelejd Alibeaj ka dalë forcë e tretë me 3 mandate ose 7.55% të votave. PSD me 5.35% të votave fiton 2 mandate. Fryma e Re Demokratike ka fituar 2 mandate me 4.49% të votave. Partia Republikane 2.45% të votave, siguron një mandat. Partia e Lëvizja e Legalitetit siguron një mandat me 2.16% të votave. Aleanca Liberale e Djathtë fiton një mandat me 2.69% të votave.
Ndërkohë dhe në Bashkinë e Vorës janë numëruar të gjitha kutitë e votimit. Dhe këtu kryeson Partia Socialiste me 49.69% të votave, 13 mandate. Koalicioni ”Bashkë Fitojmë” ka marrë 16.45% të votave, 4 mandate. Partia Agrare Ambientaliste me 8.06% të votave ka marrë 2 mandate. Fryma e Re Demokratike dhe Partia Republikane kanë siguruar secila nga një mandat me 6.08% të votave dhe 5.14% të votave.
Në bashkinë e Rrogozhinës dhe Kavajës nuk ka nisur ende numërimi për këshilltarët bashkiakë.
