Ditën e sotme ka nisur viti i ri shkollor 2023-24 në të gjitha institucionet e arsimit parauniversitar. Këtë vit do të ulen për herë të parë në bankat e shkollës rreth 29 mijë nxënës, ndërsa në klasat e 10-ta rreth 27 mijë.
Nxënësit e arsimit bazë nga klasa e parë deri në klasën e 9-të si dhe 16 kategori në nevoja të veçanta në arsimin e mesëm edhe këtë vit shkollor kanë përfituar tekste falas.
Sipas njoftimit të Kryeministrit Rama disa ditë më parë risi këtë vit janë tekstet falas për nxënësit nga klasa e parë në të tretë, që do të thotë se në fund të vitit nuk do t’i dorëzojnë tekstet; kjo bëhet për shkak të moshës së vogël dhe vështirësisë që kanë për t’u kujdesur mirë për librin, sepse shumë tekste janë me shënime dhe kjo bëhet e vështirë që nxënësit e brezit tjetër t’i përdorin.
Gjithashtu, pak ditë më parë, ministri i Brendshëm Taulant Balla prezantoi edhe paketën e re të sigurisë për nxënësit në shkolla.
