KORÇË– Dita e parë e aplikimeve për subvencionin e naftës ka sjellë radhë në drejtorin e bujqësisë në Korçë. Dhjetra fermerë gjenden pranë zyrave të kësaj drejtorie , në pritje për të dorëzuar dokumentacionin e nevojshëm për përfitimin e naftës.
Sipas drejtorit Vullnet Gjolla duke folur për Euronews Albania, dita e parë e aplikimeve ka sjellë rradhën e gjatë në drejtori, ndërsa ka bërë thirrje që të mos shpejtohen pasi ka afat deri në 20 ditë dhe aplikimet bëhen edhe online në çdo moment, po ashtu dhe në 4 agropikat e qarkut. Sipas fermerëve, radha është krijuar që prej mëngjesit, ndërsa kanë disa orë pritje deri në dorëzim të dokumentacionit. Situata sipas tyre, nuk është normale sidomos për moshat e treta.
Fermeri: Naftën kemi të vitit të kaluar që nuk e kemi marrë. Erdha këtu, pastaj nuk më merrnin në telefon. Unë ja dhashë kartën e identitetit, nuk më morën në telefon. Kam ardhur shpesh herë po nuk ma kanë dhënë,
Këtë të hënë u hapën aplikimet për fermerët që synojnë të subvencionohen me naftë në bujqësi. Në Lushnjë, rajonin më të madh bujqësor në vend, ka pasur qindra fermerë që janë dyndur pranë pikave të aplikimit që në orët e para të mëngjesit. Ndryshe nga një vit më parë, këtë herë skema e subvencionimit të karburantit vendos disa kritere kufizuese siç është sipërfaqja e tokës, e cila duhet të jetë mbi 1 hektarë, të jetë me dokumente pronësie apo kontrata qiraje etj. Ndonëse aplikimi bëhet dhe në e-Albania, shumë fermerë thonë se nuk mund ta kryejnë këtë proces online duke u ‘detyruar’ që të paraqiten fizikisht pranë agro-pikave.
